ანრი ოხანაშვილი: უსაფრთხოების საბჭოში პრეზიდენტის ჩართვა კონსტიტუციურ უხერხულობას ქმნის

პრეზიდენტის საპარლამენტო მდივანი დიმიტრი გაბუნია თავდაცვის კომიტეტის თავმჯდომარეს ირაკლი სესიაშვილს შეხვდა. დიმიტრი გაბუნიას საკანონმდებლო ორგანოში ვიზიტი ეროვნული უსაფრთხოების საბჭოს მუშაობაში პრეზიდენტის მონაწილეობას ეხებოდა.

საპარლამენტო მდივნის განმარტებით, პარლამენტში წარდგენილ კანონპროექტში უნდა გაჩნდეს ჩანაწერი, რომლის მიხედვითაც, პრეზიდენტს ექნება უფლებამოსილება მონაწილეობა მიიღოს საბჭოს სხდომებში. მისივე თქმით, ამ საკითხზე პრეზიდენტის ადმინისტრაციის პოზიცია პრინციპული და ცალსახაა.

თავდაცვის კომიტეტის თავმჯდომარე ირაკლი სესიაშვილი კი აცხადებს, რომ უსაფრთხოების საბჭოში პრეზიდენტის მონაწილეობით შესაძლოა, სახელისუფლო შტოებს შორის განაწილების პრინციპი დაირღვეს. სესიაშვილის თქმით, მთავარია, რომ პრეზიდენტი მუდმივად იყოს ინფორმირებული თავდაცვის საკითხებზე.

დღეს ამ საკითხზე კომენტარი პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმაც გააკეთა. ოხანაშვილის თქმით, ეროვნული უსაფრთხოების საბჭოს ახალ მოდელში პრეზიდენტის გათვალისწინება კონსტიტუციურ უხერხულობას ქმნის. მის კომენტარს 1tv.ge ავრცელებს. 

„საკითხი ხელისუფლების დანაწილების პრინციპს, როლს, ასევე მთავრობის, მთავრობის მეთაურისა და პრეზიდენტის ფუნქციებს ეხება. ქვეყნებში, სადაც ისეთივე მოდელია, როგორიც ჩვენთან, ეს საბჭო პრემიერ-მინისტრის დაქვემდებარებაშია. აღნიშნულ მოდელში პრეზიდენტის გათვალისწინება მისი ფუნქციიდან გამომდინარე, ძალიან ბევრ კონსტიტუციურ უხერხულობას ქმნის. არსებობს რაღაც პრინციპები, რასთან დაკავშირებითაც საკითხების გადაწყვეტა ხდება. პრემიერისა და პრეზიდენტის ფუნქციებიდან გამომდინარე, სწორი გადაწყვეტილება იქნა მიღებული. თუმცა კონსულტაციებს დაველოდოთ და შემდგომ შეგვიძლია  დეტალებზე ვისაუბროთ”,- განაცხადა ანრი ოხანაშვილმა.

„შენების მოძრაობის“ ლიდერს და პარლამენტის ყოფილ თავმჯდომარეს დავით უსუფაშვილს ამ საკითხზე თავისი რეკომენდაცია აქვს. უსუფაშვილს მიაჩნია, რომ უსაფრთხოების საბჭოს საქმიანობა უნდა უზრუნველყოს მთავრობის ადმინისტრაციის სპეციალურმა ქვედანაყოფმა, რომელსაც უხელმძღვანელებს პრემიერ-მინისტრის მიერ დანიშნული საბჭოს მდივანი.

"ეს აუცილებელია, რადგან საქართველოს პრეზიდენტმა, როგორც სახელმწიფოს მეთაურმა და უმაღლესმა მთავრსარდალმა, უნდა გაიზიაროს პასუხისმგებლობა ქვეყნის უსაფრთხოებაზე, რისთვისაც უნდა ჰქონდეს შეუზღუდავი წვდომა შესაბამის ინფორმაციაზე და ანალიტიკურ მასალაზე. უსაფრთხოების საბჭოს მდივანი კი უნდა იყოს პრემიერ-მინისტრის „ჩრდილი და აჩრდილი“ უსაფრთხოების სტრატეგიულ საკითხებში შესაბამის სახელმწიფო ორგანოებთან და საერთაშორისო პარტნიორებთან კომპლექსურ ურთიერთობაში. ამ საქმეს ყოველდღიურად სჭირდება მაღალი რანგის პროფესიონალის 24 საათი და არა რომელიმე მინისტრის გამოძებნილი 24 წუთი", - წერს დავით უსუფაშვილი Facebook-ზე.

პრეზიდენტის მიერ ფიცის დადების შემდეგ, 2018 წლის 16 დეკემბერს საქართველოს ახალი კონსტიტუცია ამოქმედდა. კონსტიტუციის მიხედვით, გაუქმდა უშიშროების საბჭო და მის ნაცვლად, საომარი მდგომარეობის დროს, სათათბირო ორგანო ეროვნული თავდაცვის საბჭოს შექმნა განისაზღვრა, რომლის თავმჯდომარეც საქართველოს პრეზიდენტი იქნება. 

უშიშროების საბჭოს ნაცვლად კი უნდა შეიქმნას ეროვნული უსაფრთხოების საბჭო, რომელიც პრემიერმინისტრთან არსებული უსაფრთხოების საკითხების მაკოორდინირებელი სათათბირო ორგანო იქნება.