ბესელია: მოსამართლეებზე ინიციატივის შესახებ „ქართული ოცნების“ განცხადებაში უზუსტობებია

„ქართული ოცნების“ ცენტრალურ ოფისში პოლიტსაბჭოს სხდომის დასრულების შემდეგ მმართველმა გუნდმა მოსამართლეებზე ეკა ბესელიას და კიდევ 8 დეპუტატის ინიციატივაზე განცხადება გაავრცელა. განცხადების თანახმად, საპარლამენტო უმრავლესობა მოსამართლეებზე 9 დეპუტატის ინიციატივას მხარს არ დაუჭერს.

ამ გადაწყვეტილებას ინიციატივის ავტორები გამოეხმაურნენ. დეპუტატ ეკა ბესელიას თქმით, თუ მოსამართლეთა უვადოდ დანიშვნის შეჩერების პრინციპს ეთანხმება უმრავლესობა, კანონპროექტის ფორმულირების კონსტიტუციასთან შესაბამისობა საბაბია. მის კომენტარს სააგენტო "ინტერპრესნიუსი" ავრცელებს.

ეკა ბესელიას განცხადებით, "ქართული ოცნების" პოლიტსაბჭოს განცხადებაში რამდენიმე უზუსტობაა. კერძოდ, ის ამბობს, რომ არასწორია ინფორმაცია, თითქოს უმრავლესობამ ამ ინიციატივის მომზადების შესახებ არაფერი იცოდა:

"მე ორჯერ დავაყენე საკითხი, მათ შორის ბოლო სხდომაზე, რომ უვადოდ მოსამართლეთა გამწესების შეჩერებას დაუჭერდნენ თუ არა მხარს. იდეას დაეთანხმა ყველა. არავის არც ერთ სხდომაზე არ უთქვამს, რომ არ ეთანხმება პრინციპს - ან ვერ თქვეს. არავის უთქვამს, რომ ეს იდეა კონსტიტუციას ეწინააღმდეგება. ეს არ ყოფილა შეუთანხმებელი", - თქვა ბესელიამ.

რაც შეეხება ფორმულირებას, ეკა ბესელიას თქმით, ამის თაობაზე განხილვა ამ დრომდე არც ფრაქციას, არც უმრავლესობას და არც კომიტეტს არ ჩაუნიშნავს.

"ფორმულირების შეცვლა ან დამატება ახლაც შესაძლებელია პირველ მოსმენამდე. თუ პრინციპს ეთანხმება უმრავლესობა, ფორმულირების შესაბამისობა კონსტიტუციასთან, საბაბია. რაც შეეხება არგუმენტს, რომ ეს შეამცირებს მოსამართლეთა რაოდენობას, არ არის სწორი. ჩვენ არ ვამბობთ, რომ მოსამართლეთა რაოდენობა შევამციროთ. არ ვამბობთ ასევე, რომ ახალი მოსამართლეების შემოსვლა და 3 წლით გამწესება შეუძლებელია," - განაცხადა ეკა ბესელიამ.

დეპუტატ ლევან გოგიჩაიშვილის განცხადებით, რომელიც ინიციატივის ერთ-ერთი ავტორია, ირაკლი კობახიძის დღევანდელი განცხადება გულწრფელი არ არის. მის კომენტარს 1tv.ge ავრცელებს.

„მოგვცენ იმის გარანტია, რომ ჩინჩალაძეს არ აბარებენ უვადოდ სასამართლოს. რას ნიშნავს, კანონპროექტს ახლა ჩავაგდებთ და ხვალ ვიმსჯელებთ, ეს არასერიოზულია. გამოდის, რომ რადგან ჩვენი ინიციატივაა გვეჯიბრებიან, ინიციატივას ვინ გამოიჩენს. ოღონდ საქმე გააკეთონ და საერთოდ გვერდზე გავიწევით. პრობლემა არ არის, ამას ჩემთვის კი არ ვაკეთებ. თუ რამის გაკეთება უნდოდათ, ვფიქრობ, მორატორიუმი პირველი პასუხია ამაზე. განცდა, რომ ჩინჩალაძეს ვიღაც დასანიშნი ჰყავს და იმ მოსამართლეს რა ეშველება, რომელსაც ჩინჩალაძე ცოტა ხანში ვერ დანიშნავს, ეს არ არის არგუმენტი, რომლითაც საზოგადოებას უნდა უპასუხოს“, – განაცხადა ლევან გოგიჩაიშვილმა.

მისივე თქმით, საპარლამენტო უმრავლესობასთან ერთად მოსამართლეების საკითხზე მსჯელობა ორჯერ შედგა და საინიციატივო ჯგუფმა ორივეჯერ განაცხადა, რომ კანონპროექტს მოამზადებდა და მას პარლამენტში ინიციატივის სახით შეიტანდა.

"არც იმ ადამიანებს არაფერი არ უთქვამთ, ვინც დღეს ერთმანეთს ვერ ასწრებენ, თქვან, რომ ეს კანონპროექტი არაკონსტიტუციურია ან სასამართლოს პრობლემა ექმნება. ერთი სიტყვა ვინმეს გულწრფელად რომ ეთქვა, ჩავთვლიდი, რომ მართალი არ ვარ", – განაცხადა ლევან გოგიჩაიშვილმა.

9 დეპუტატის ინიციატივასთან დაკავშირებით "ქართული ოცნების" პოლიტსაბჭომ პარტიის ცენტრალურ ოფისში გამართული შეხვედრის შემდეგ, განცხადებაც გაავრცელა.

7 თებერვალს პარლამენტის 9 დეპუტატმა პარლამენტში კანონპროექტი დაარეგისტრირა, რომლის მიხედვითაც „საერთო სასამართლოების შესახებ“ კანონში ცვლილებებს ითხოვენ. მათ სურთ, რომ რაიონულ და სააპელაციო სასამართლოებში მოსამართლეთა უვადოდ გამწესება 2024 წლის 31 დეკემბრამდე შეჩერდეს. 

11 თებერვალს ეკა ბესელიამ განაცხადა, რომ პარლამენტს კიდევ ერთ ინიციატივას წარუდგენს, რომელიც უვადოდ უკვე დანიშნულ მოსამართლეებს შეეხება.