პოლიტსაბჭოს სხდომას ბიძინა ივანიშვილი, მამუკა ბახტაძე და ირაკლი კობახიძე ესწრებიან

"ქართული ოცნების" ცენტრალურ ოფისში პოლიტსაბჭოს სხდომა მიმდინარეობს. სხდომას პარტიის თავმჯდომარე ბიძინა ივანიშვილი უძღვება. ოფისში იმყოფებიან პრემიერმინისტრი მამუკა ბახტაძე და  პარლამენტის თავმჯდომარე ირაკლი კობახიძე, რომელმაც ბაქოში ვიზიტი შეწყვიტა.

შეხვედრის დაწყების წინ კომენტარი არ გაკეთებულა. 

„ქართული ოცნების“ ოფისთან, სადაც პოლიტსაბჭოს სხდომა მიმდინარეობს, მმართველი გუნდის ყოფილი წევრი ლევან გოგიჩაიშვილი მივიდა. მან პარლამენტის თავმჯდომარის გადადგომა მოითხოვა და გუშინდელ მოვლენებზე პასუხისმგებლობა ხელისუფლებას დააკისრა. 

ოფიციალური მონაცემებით, რუსთაველის გამზირზე გუშინ განვითარებული მოვლენების დროს ჯამში 240 ადამიანი დაშავდა.

მათგან 102 ამ დრომდე სხვადასხვა კლინიკებში განაგრძობს მკურნალობას. 240 დაშავებულიდან 80 სამართალდამცველია.

განცხადება ამის შესახებ საგანგებო სიტუაციების კოორდინაციისა და გადაუდებელი დახმარების ცენტრის ხელმძღვანელმა, ავთანდილ თალაკვაძემ "ნიუ ჰოსპიტალსის" შენობასთან გააკეთა. მან კლინიკაში დაშავებულები მოინახულა და მათ მდგომარეობას ადგილზე გაეცნო.

ჯანდაცვის მინისტრის მოადგილემ ზაზა ბოხუამ ინგოროყვას კლინიკაში გადაყვანილი პაციენტები მოინახულა.

„ინგოროყვას კლინიკაში მოყვანილი იყო 46 პაციენტი, აქედან 35 გაწერილია და რჩება 11 პაციენტი, რომლებსაც უტარდებათ შესაბამისი სამედიცინო გამოკვლევები და დახმარება. ყველას მდგომარეობა არის სტაბილური.

ჯამში, სამედიცინო დაწესებულებებში გადაყვანილია 240 პაციენტი, ამ დრომდე საავადმყოფოებში რჩება 102 პაციენტი. 240 დან 80 იყო პოლიციელი.

ჩატარდა ორი ქირურგიული ოპერაცია. ამ დრომდე ერთი პაციენტის მდგომარეობა რჩება სტაბილურად მძიმე, თუმცა სიცოცხლისთვის შეუთავსებელი დაზიანებები არ გვქონია“. 

პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა. 

რუსთაველის გამზირზე აქცია მას შემდეგ დაიგეგმა, რაც გუშინ დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

საპარლამენტო ოპოზიცია ირაკლი კობახიძის პასუხისმგებლობის საკითხის დაყენება და მის გადადგომას მოითხოვა. პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

რუსეთის დელეგაციამ, მათ შორის სერგეი გავრილოვმა საქართველო უკვე დატოვა.