ბესელიამ და ზარდიაშვილმა ერთმანეთს ნათელმირონი შეახსენეს

საპარლამენტო უმრავლესობის წევრი, დეპუტატი ვანო ზარდიაშვილი გუნდიდან ეკა ბესელიას წასვლას დანაკარგად არ მიიჩნევს. ამის შესახებ მან პარლამენტში თავად განაცხადა. ვანო ზარდიაშვილის თქმით, ეკა ბესელიამ წასვლის მიზეზად ბევრი საკითხი დაასახელა, რის გამოც ზარდიაშვილს ეჭვი ეპარება, რომ ბესელიას წასვლა რაიმე კონკრეტულს უკავშირდებოდეს. მის კომენტარს 1tv.ge ავრცელებს.

„ეკა ბესელიამ თავის წასვლის მიზეზად უკვე მრავალი მიზეზი დაასახელა, აქედან გამომდინარე ეჭვი მეპარება, რომ რაიმე კონკრეტულს უკავშირდებოდეს ეკას. მე იმისთვის წავედი, რომ მისი წასვლისთვის ხელი არ შემეშალა“, – განაცხადა ვანო ზარდიაშვილმა.

ვანო ზარდიაშვილმა კიდევ ერთხელ გააკეთა კომენტარი მოსამართლე მიხეილ ჩინჩალაძესთან მეგობრობის შესახებ და თქვა, რომ ამ საკითხზე სპეკულაციები უნდა დასრულდეს და ამისთვის „პარალელი გაავლო“:

„მუდმივად უსვამენ ხაზს მოსამართლე მიხეილ ჩინჩალაძესთან ჩემს მეგობრობას. რატომღაც არავინ არასდროს ახსენებს ქალბატონ ეკას ნათელმირონს ზაზა მეიშვილს, რომელიც სისხლის სამართლის პალატას კურირებდა. არავინ არ ახსენებს ასევე მის ნათელმირონსა და უახლოეს მეგობარს, ნონა წოწორიას, რომელიც ზურაბ ადეიშვილის მოადგილე იყო და ასევე ევროსასამართლოში საქართველოს მოსამართლეს წარმოადგენდა.

მე ამას იმიტომ ვამბობ და ხაზს ვუსვამ, რომ მეგობრობა არასდროს არ განსაზღვრავს არც კანის ფერს, არც პოლიტიკურ სპექტრს და ოჯახურ გარემოებას. შესაბამისად, თუ მაინცდამაინც ამ თემებით გვინდა მსჯელობა, დავიწყოთ მაშინ ამ საკითხებით. რა კავშირები აქვს ქალბატონ ბესელიას ზაზა მეიშვილთან, ნონა წოწორიასთან და ასე შემდეგ“, – განაცხადა ვანო ზარდიაშვილმა.

ვანო ზარდიაშვილის ამ განცხადებასთან დაკავშირებით კომენტარის გაკეთება დეპუტატ ეკა ბესელიას სთხოვეს. დეპუტატმა ტრაგიკომიკური უწოდა იმ ფაქტს, რომ დღეს „ქართული ოცნების“ სახელით ზურაბ ადეიშვილის ხელის ბიჭი ვანო ზარდიაშვილი ლაპარაკობს“. 

„ეს არის ჩემთვის ტრაგიკომიკური და ვწუხვარ ძალიან, ვუსამძიმრებ პარტიას, რომელიც ჩემთვის არ არის სულერთი და ზარდიაშვილის ტიპის ყოფილი ზონდერები თუ ყოფილები, არსებობენ „ქართული ოცნების“ სახელით. რას ილაპარაკებს ზარდიაშვილი საერთოდ არ მაინტერესებს. ის არ არის იმ წონით კატეგორიაში, რომელსაც მე უნდა ვუპასუხო. ხელის ბიჭი იყო ყოველთვის და ასეთად დარჩა დღესაც. გუშინ იყო „ნაციონალური მოძრაობის“ ხელის ბიჭი, დღეს მათი ნარჩენების ხელის ბიჭი და მათი დავალებების შემსრულებელი ადამიანია“, – განაცხადა ეკა ბესელიამ.

ბესელიას თქმით, ის ბევრი რამის შემსწრეა და შესაძლოა, ზარდიაშვილს მძიმე კითხვებზე მოუწიოს პასუხების გაცემა.

„ძალიან ბევრი რამის შემსწრე ვარ. არ ვურჩევ, რომ ერთ მშვენიერ დღეს სერიოზულად დავაპირო კომენტარების გაკეთება, თორემ ძალიან მძიმე პასუხების გაცემა მოუწევს. ის ყოველთვის ვიღაცის შემსრულებელია და ვწუხვარ, რომ „ქართული ოცნება“ ასეთი ზონდერების სახელით დღეს ჩნდება საზოგადოების წინაშე. ის იყო პირდაპირი დავალებების შემსრულებელი და ამბების მიმტან-მომტანი თავისი მეგობარი მოსამართლეების ხელში. ამიტომაც მივუჩინე ადგილი იქ, სადაც მისი ადგილი იყო“, – განაცხადა ეკა ბესელიამ.

„ვაიძულე ეს ადამიანი, დისტანცირებული ყოფილიყო პროცესებისგან, რომელშიც დიდი სურვილი ჰქონდა, ოჯახური ბიზნესი აეწყო და ეს სასამართლოა, რომლის მიმართაც დიდი ინტერესები აქვს. თანამდებობა დატოვა და ბუნებრივია, ამას ვერ ინელებს. „ნაციონალურმა მოძრაობამაც“ კი არ იცოდა მის რიგებში როგორ აღმოჩნდა. პარლამენტის წევრის სახელით საუბრობს ახლა თოთხმეტი წლის წინ ნათლიმირონობაზე. იმ ადამიანებზე საუბარს, რომელიც არ არიან სისტემაში, უმჯობესია, კითხვებს უპასუხოს, რაც მის პირდაპირ ინტერესებთან დაკავშირებით არსებობს. სხვათა შორის, სამწუხაროდ, 14 წელია მაგალითად ზაზა მეიშვილი არ მინახავს“, - განაცხადა ბესელიამ.

2018 წლის დეკემბრის ბოლოს იურიდიულ საკითხთა კომიტეტის თავმჯდომარის მოადგილემ ვანო ზარდიაშვილმა თანამდებობა დატოვა. მალევე თავმჯდომარის პოსტი დატოვა ეკა ბესელიამაც. როგორც მაშინ ბესელიამ თქვა, ის ვერ დაუტოვებდა იურიდიული კომიტეტის თავმჯდომარის მოვალეობის შესრულებას ვანო ზარდიაშვილს, რადგან ბესელიას თქმით, ზარდიაშვილს უზენაესი სასამართლოს მოსამართლეობის მაშინდელ 10-კაციან სიასთან დაკავშირებულ პროცესებში საკუთარი ინტერესები ჰქონდა.

საბოლოოდ, ეკა ბესელიამ საპარლამენტო უმრავლესობა და პარტია „ქართული ოცნებაც“ დატოვა.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა. ამ კანდიდატების დასახელებამ საზოგადოების ვნებათაღელვა გამოიწვია.

მოგვიანებით მოსამართლეებმა კანდიდატურები მოხსნეს და შეიქმნა სამუშაო ჯგუფი უზენაესი სასამართლოს მოსამართლეების კანდიდატების შერჩევის კრიტერიუმების დასადგენად.