ენერგოომბუდსმენი წყლის ტარიფთან დაკავშირებული პროექტი არ მოსწონს

ენერგოომბუდსმენს მიაჩნია, რომ წყლის ტარიფთან დაკავშირებული პროექტი მომხმარებელთა ინტერესების გაუმჯობესებას არ ემსახურება და ის უარყოფითად აისახება ფიზიკურ პირებზე, რომლებიც საკუთარ საცხოვრებელ სახლებში დროებით თმობენ ოთახებს სტუმრების მისაღებად. ამის შესახებ ენერგოომბუდსმენის განცხადებაში წერია.

სემეკის კომისიის განმარტებით, საოჯახო სასტუმროდ ჩაითვლება საცხოვრებელი ფართი, სადაც მესაკუთრეებიც ცხოვრობენ და ამავდოულად სახლში სტუმრებს იღებენ. ეს კი იმას ნიშნავს, რომ წლის განმავლობაში, ოჯახს სტუმარი ეყოლება თუ არ ეყოლება, ნაწილობრივ გადაიხდის არასაყოფაცხოვრებო ტარიფით (თუკი ლიმიტს გადააჭარბებს), ხოლო მცირე ნაწილს საყოფაცხოვრებო ტარიფით.

"ე.ი. არასაყოფაცხოვრებო ტარიფის გავრცელების ობიექტი სწორედ ეს ვიწრო ჯგუფი იქნება, რომლებიც საკუთარ საცხოვრებელ სახლში თმობენ გარკვეულ ფართს სტუმრების გამასპინძლებისთვის.

თუმცა პროექტით გათვალისწინებული ნორმის სიტყვასიტყვითი განმარტებიდან გამომდინარე, ის შეიძლება გავრცელდეს ნებისმიერ ფიზიკურ პირზე, რომლის საცხოვრებელ ადგილად ითვლება უძრავი ქონება და თან მასპინძლობს სტუმრებს", - წერია განცხადებაში.

ენერგოომბუდსმენის აზრით, შეუძლებელია საკუთარ სახლებში ოთახების გაქირავება შეფასდეს საოჯახო სასტუმროდ. 

სალომე ვარდიაშვილმა კომისიას განუმარტა, რომ პროექტის ჩანაწერის მიხედვით ე.წ. საოჯახო სასტუმროს ტიპს დაექვემდებარება ძალიან ბევრი ფიზიკური პირი და წყალმომარაგების კომპანიებს ეძლევათ შესაძლებლობა თავისი შეხედულების მიხედვით, მრავალმხრივად განმარტონ ნორმა.

"მაგალითად, თბილისში, კერძო დასახლებებში გამოვკითხეთ რამდენიმე სახლის მესაკუთრე, რომელთაც აღნიშნეს, რომ ისინი თავიანთ საცხოვრებელ სახლებში (სადაც აგრეთვე რჩებიან საცხოვრებლად ოჯახით) სისტემატურად აქირავებენ ოთახებს სტუდენტებზე, რაც შემოსავლის ერთადერთი წყაროა ზოგიერთი მათგანისთვის. მათი განმარტებით, სტუდენტი ახალგაზრდების მშობლებთან შეთანხმებით, დიასახლისი ალაგებს გაქირავებულ ოთახებს, რეცხავს ტანსაცმელს და თეთრეულს. ამასთანავე, ქირავნობის შესახებ განცხადებაში ხშირად ვკითხულობთ, რომ ბინა ქირავდება მხოლოდ გოგონებზე, ვინაიდან ბინაში იცხოვრებს დიასახლისიც (ძირითადად ეხება ეს კორპუსის ბინებს). აგრეთვე გვაქვს ოთახების დათმობის შემთხვევები კორპუსში განთავსებულ ბინებში, სადაც საცხოვრებლად რჩება ოჯახიც. აღსანიშნავია, ბინების და ფართების გაქირავება სეზონურად ზღვისპირეთში (ე.წ. კოიკების გაქირავება) და მთის კურორტებზე. ხშირია შემთხვევები, როდესაც კერძო სახლში ქირავდება მხოლოდ ერთი ოთახი, მაგალითად, საძინებელი, რომლითაც მესაკუთრე სარგებლობს და მხოლოდ იმ შემთხვევაში თმობს, თუკი სტუმარი ეყოლება", - წერია ენერგოომბუდსმენის განცხადებაში.

26 თებერვალს საოჯახო ტიპის სასტუმროების სასმელი წყლის ტარიფთან დაკავშირებით სემეკის კომისიის სამუშაო ჯგუფის პირველი შეხვედრა გაიმართა. შეხვედრის შემდეგ ცნობილი გახდა, წყლის ტარიფის ცვლილება ბინის გამქირავებლებს, ანუ იმ ადამიანებს, რომლებიც სრულად აქირავებენ ბინას სხვადასხვა მიზნებით, არ შეეხებათ.