ეუთომ საპრეზიდენტო არჩევნებზე მედიის მუშაობა შეაფასა

ეუთოს საარჩევნო-სადამკვირვებლო მისიის საბოლოო ანგარიშში საუბარია არჩევნების დროს მედიის მუშაობაზეც. აღნიშნულია, რომ „რუსთავი 2“,  ღიად ანიჭებდა უპირატესობას "ერთიან ნაციონალურ მოძრაობას", რომლის გაშუქებასაც ნეიტრალური და დადებითი კუთხით  22 პროცენტი დაეთმო, „ქართულ ოცნებასა“ და „ქართული ოცნების“ მხარდაჭერილ კანდიდატს კი ნეგატიური და ნეიტრალური გაშუქების თვალსაზრისით, 26 და 11 პროცენტი ერგო.

დოკუმენტში ასევე მოცემულია, რომ რუსთავი 2-ის აღმასრულებელი დირექტორი ნიკა გვარამია აქტიურ კამპანიას ეწეოდა ზურაბიშვილის წინააღმდეგ სოციალურ მედიაში. კონკრეტულად, ხუთ  ოქტომბერს, მან პირობა დადო, რომ „მოღალატე“ სალომეს წაგებაში დაეხმარებოდა და შემდეგ მის მომხრეებს მიუბრუნდებოდა.

ეუთოს ანგარიშში აღნიშნულია, რომ „იმედმა“ „ქართული ოცნებისა“ და „ქართული ოცნების“ მიერ მხარდაჭერილი კანდიდატი 32იპროცენტით ნეიტრალურად, 14 პროცენტით კი დადებითად გააშუქა. "ერთიანი ნაციონალური მოძრაობა" კი ნეიტრალურ და ნეგატიურ ჭრილში 15 პროცენტით გააშუქა. რაც შეეხება ტელეკომპანია „იმედის“ მიერ პროცესების გაშუქებას, მაყურებელს შევახსენებთ, რომ ჩვენმა ტელეკომპანიამ არჩევნების მეორე ტურის წინ,  ცალსახად განაცხადა, რომ არ დაუშვებდა ხელისუფლების სათავეში ნაციონალური მოძრაობის დაბრუნებას და „იმედი“ მუშაობის საგანგებო რეჟიმზე  გადავიდა

ამომრჩევლის დაშინების, საჯარო მოხელეებზე ზეწოლის ან ხმების ყიდვის ფაქტებზე შესაბამისმა უწყებებმა დაუყოვნებლივ უნდა მოახდინონ რეაგირება - ეს ამონარიდია ასევე ეუთოს საბოლოო ანგარიშიდან, რომელიც საქართველოს საპრეზიდენტო არჩევნებს ეხებოდა. 48-გვერდიან დოკუმენტში დეტალურად არის აღწერილი საარჩევნო კამპანიის და უშუალოდ არჩევნების დროს განვითარებული პროცესები. ზოგად შეფასებად აღნიშნულია, რომ არჩევნები იყო გამჭვირვალე და სამართლიანი, თუმცა არის კრიტიკული შეფასებები. ანგარიშში საუბარია ნეგატიურ კამპანიაზე, უხეშ რიტორიკასა და ძალადობრივ ინციდენტებზე. ხაზგასმულია ვალების განულების შესახებ მთავრობის წინასაარჩევნო ინიციატივა, რომელმაც ორგანიზაციის შეფასებით,   არასამართლიანი უპირატესობა მიანიჭა „ქართული ოცნების“  მიერ მხარდაჭერილ კანდიდატს. ყურადღება გამახვილებულია შეწირულობათა კუთხით უთანასწორო გარემოზეც. 

ეუთოს ანგარიშს განსხვავებული პოლიტიკური შეფასებები მოჰყვა. უმცირესობაში ყურადღებას რეკომენდაციებზე ამახვილებენ და მოუწოდებენ ხელისუფლებას გაითვალისწინონ დოკუმენტში არსებული მითითებები. მმართველ გუნდში არ ეთანხმებიან კრიტიკულ შეფასებებს და ამბობენ, რომ ეუთოს შეფასებით, საბოლოო ჯამში არჩევნები სამართლიან გარემოში ჩატარდა.