გიორგი გახარია: ფერმერს სჭირდება დახმარება, რათა ერთ წელიწადში, როცა ყველაფერი აღდგება, ფორმა არ დავკარგოთ და ვიყოთ მზად

ფერმერს სჭირდება დახმარება, რათა შევინარჩუნოთ თავი და ერთ წელიწადში, როცა ყველაფერი აღდგება, ფორმა არ დავკარგოთ და ვიყოთ მზად, - ამის შესახებ პრემიერ-მინისტრმა, გიორგი გახარიამ სოფელ ნიქოზის სანერგე მეურნეობაში განაცხადა, სადაც მთავრობის მეთაური შიდა ქართლის რეგიონის ფერმერებს ხვდება.

„ჩვენ როცა გადავწყვიტეთ, რომ სოფლის მეურნეობა უნდა ყოფილიყო მეორე დარგი, რომელსაც უნდა დავხმარებოდით, ამას მარტივი ახსნა ჰქონდა. ტურიზმს რაც შეეხება, გასაგებია, პირველი დარტყმა მან მიიღო. მეორე დარტყმა კი სოფლის მეურნეობამ მიიღო. რისი მოყვანაც სოფლის მეურნეობას ჰქონდა დაგეგმილი - ვაშლი, თხილი, ყურძენი, ღვინო - ეს ყველაფერი იმ ტურიზმზეც იყო გათვლილი. ჩვენ გვესმის, რომ ამ დარგის დახმარება აუცილებელია. ფერმერს სჭირდება დახმარება, რათა შევინარჩუნოთ თავი და ერთ წელიწადში, როცა ყველაფერი აღდგება, ფორმა არ დავკარგოთ და ვიყოთ მზად. დაახლოებით 300 მილიონი ლარია ახლა სოფლის მეურნეობის დახმარების ბიუჯეტი. მესმის, რომ კიდევ უფრო მეტია საჭირო, მაგრამ მთავრობის და ნორმალური პასუხისმგებლიანი ხელისუფლების ამოცანა ძალიან მარტივია. ის რესურსი, რომელიც აქვს სუსტი ეკონომიკის მქონე პატარა ქვეყანას, სამართლიანად უნდა გადაუნაწილდეს ყველა იმ ადამიანს, ვისაც ეს სჭირდება. მესმის, რომ 300 მილიონი კი არა, შეიძლება 600 მილიონიც სჭირდებოდეს, მაგრამ დღეს ამ მინიმუმის გაკეთება შეგვიძლია“, - განაცხადა გახარიამ.