გიორგი გახარია: მომავალი 4 წლის განმავლობაში საქართველოში ინფრასტრუქტურულ პროექტებში მინუმუმ 20 მილიარდი ლარი დაიხარჯება

ყველას კარგად უნდა გვესმოდეს, რომ როდესაც ჩვენი ქვეყნის მომავალსა და გურიაზე ვსაუბრობთ, რა თქმა უნდა, ისიც უნდა გავითვალისწინოთ, რომ ბევრი გამოწვევაა: სამუშაო ადგილების, ინფრაქტრუქტურის პრობლემებია, მაგრამ მთავარი ისაა, რომ ჩვენ ყველა ერთად ვმუშაობთ და ვხედავთ ყოველდღიურ პროგრესს, - ამის შესახებ პრემიერ-მინისტრმა ლანჩხუთისა და ჩოხატაურის მაჟორიტარი დეპუტატობის კანდიდატის, ვასილ ჩიგოგიძის წარდგენისას განაცხადა.

გიორგი გახარიას თქმით, დღეს გურიაში მარტივი პრობლემები არ არის. „მაგალითად, ლანჩხუთის წყალალმომარაგება ასე თუ ისე ნორმალურ კონდიციაში მოვიყვანეთ, სოფლებში წყლის მომარაგება პრობლემაა, ისევე როგორც შიდა სასოფლო გზები. მაგრამ მე ერთი რამ მინდა გითხრათ: მიუხედავად გლობალური გამოწვევისა და პანდემიისა, ბოლო 8 თვის განმავლობაში ქვეყანაში, მათ შორის გურიაში სისტემურ ინფრასტრუქტურულ პროექტებზე მუშაობა არც ერთი საათით არ შეჩერებულა. ამის შედეგია ის, რომ სამტრედია-გრიგოლეთის 2 მონაკვეთი გაიხსნა“, - განაცხადა პრემიერ-მინისტრმა.

მისივე თქმით, მთავრობის მთავარი მიზანი და ამოცანა ისაა, რომ არ უნდა იყოს დიდი განსხვავება იმაში, თუ სად ცხოვრობს ადამიანი და ყველას დაახლოებული პირობები უნდა ჰქონდეს.

„განსაკუთრებით ახალგაზრდებს. მათ უნდა შეეძლოთ თავიანთი თავის რეალიზება თავიანთ კუთხეში. ეს არის ყველაზე მნიშვნელოვანი. ინფრასტრუქტურიდან დაწყებული, წყალმომარაგებით, წყალარინებით, სკოლებით, ბაღებით, მედიცინით, ყველაფერი უნდა გავაკეთოთ იმისთვის, რომ სხვაობა დიდი არ იყოს თბილისსა და ლანჩხუთს შორის. ეს არის ჩვენი ძირითადი მიზანი. ამ მიზნიდან გამომდინარე გვაქვს ის გეგმა, რომელიც მთელი 4 წლის განმავლობაში დეტალურად გვაქვს გაწერილი და ზუსტად ვიცით, სად რა უნდა გავაკეთოთ. მომავალი 4 წლის განმავლობაში საქართველოში ინფრასტრუქტურულ პროექტებში მინუმუმ 20 მილიარდი ლარი დაიხარჯება“, - განაცხადა პრემიერ-მინისტრმა.

მისივე თქმით, ქვეყნის წინაშე თითოეულ მოქალაქეს აქვს პასუხისმგებლობა და უნდა გავუფრთხილდეთ როგორც თითოეული ადამიანის ჯანმრთელობას, ასევე თითოეულ სამუშაო ადგილს და ეკონომიკის ხვალინდელ დღეს.

„თითოეული ჩვენგანის პასუხისმგებლობა არის ჩვენი ქვეყნის წინაშე და აქ, უნდა გავუფრთხილდეთ, როგორც თითოეული ადამიანის ჯანმრთელობას, ასევე თითოეულ სამუშაო ადგილს და ეკონომიკის ხვალინდელ დღეს. ამ ყველაფრის ერთად გასაკეთებლად, რა თქმა უნდა, ჩვენ გვჭირდება გამარჯვება 31 ოქტომბერს. მე დარწმუნებული ვარ, რომ ჩვენ ამ გამარჯვებას მივაღწევთ, მაგრამ აქ, ყველაზე მთავარია, რომ ეს მძიმე ორი კვირა, რომელიც ჩვენ ახლა წინ გველის, ძალიან ტოქსიკური ორი კვირა, როდესაც პოლიტიკოსები საერთოდ ყველაფერზე მიდიან და შეიძლება ისეთები იკადრონ, რაც ნორმალურ ცხოვრებაში წარმოუდგენლადაც მოგვეჩვენოს, ამას ყველაფერს ჩვენ უნდა დავუპირისპიროთ სიმშვიდე. ჩვენ უნდა გავიმარჯვოთ სამართლიან ბრძოლაში და ღირსეულად. ღირსება არის ჩვენი ყველაზე დიდი მიღწევა და სამართლიანობა. ამიტომ, გურულებო, გამარჯვებას გისურვებთ 31 ოქტომბერს, სამართლიან ბრძოლაში და ღირსეულ გამარჯვებას,“- განაცხადა გიორგი გახარიამ.