გიორგი შენგელია: სპეცოპერაციის მთავარი მიზანი იყო, რომ მოქალაქეების სიცოცხლეს საფრთხე არ დამუქრებოდა

გუშინდელი სპეცოპერაციის მთავარი მიზანი იყო, რომ მოქალაქეების სიცოცხლეს საფრთხე არ დამუქრებოდა, - ამის შესახებ ზუგდიდში განვითარებული მოვლენების შეფასებისას ქალაქის მერმა, გიორგი შენგელიამ განაცხადა.

„ოპონენტები ცდილობენ, ნებისმიერ პროცესში პოლიტიკური დივიდენდები მოიპოვონ. გუშინდელი სპეცოპერაციის მთავარი მიზანი იყო, რომ მოქალაქეების სიცოცხლეს საფრთხე არ დამუქრებოდა. შინაგან საქმეთა სამინისტრომ, ჩვენი გმირი პოლიციელების ჩართულობით და სამხარეო პოლიციის ხელმძღვანელის ღირსეული საქციელის შედეგად, წარმატებით შეასრულა მიღებული დავალება. სპეცოპერაცია გრძელდება და დარწმუნებული ვარ, რომ საბოლოო წერტილი ამ ყველაფერს მალე დაესმევა“, - განაცხადა შენგელიამ.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა.