ვითარება რიონის ხეობაში. დეტალურად

პოლიციას ისევ გადაკეტილი აქვს გუმათიდან ნამოხვანისკენ მიმავალი გზა, ისევე, როგორც აქციის მონაწილეებს გუმათში, აქტივისტებთან მისასვლელი ბილიკი. ამის მიუხედავად, აქტივისტებმა ნამოხვანისკენ გადაადგილება მაინც სცადეს, თუმცა პოლიციამ მათ ამის საშუალება არ მისცა. ამიტომ აქციის მონაწილეებმა კომპანია „ენკასკენ“ გადაინაცვლეს.

აქციის მონაწილეები ყვებიან, რომ გუშინ, რამდენიმე აქტივისტი ჰესის მშენებელი კომპანია „ენკას“ ოფისისკენ მიდიოდა. დაპირისპირება კი მას შემდეგ დაიწყო, რაც აქციის სამ მონაწილეს აჭარიდან ჩამოსული მუსლიმი სპორტსმენები - ძმები წულუკიძეები მეგობრებთან ერთად შეხვდნენ. დაშავებულები იხსენებენ, რომ მათ ისინი იცნეს, რადგან რამდენიმე თვის წინ, სოფელ ბუკნარში განვითარებულ მოვლენებში ფიგურირებდნენ. პროტესტის მონაწილეების ნათქვამიდან ირკვევა, რომ აჭარლები მათ ქვებით და ცივი იარაღით გაუსწორდნენ. დაზარალებულები დაზიანებების ხარისხის დასადგენად, დღეს ქუთაისში, ექსპერტიზის ეროვნულ ბიუროშიც მივიდნენ.

მედიაში ვრცელდება ცნობა, რომ ნამოხვანჰესის წინააღმდეგ მიმართულ აქციაში, რუსეთში მცხოვრები, ქურდულ სამყაროში „მუსუსას“ მეტსახელით ცნობილი, რომან ლომთაძის ძმა რაულ ლომთაძეც მონაწილეობს. „ქრონიკის“ გადამღები ჯგუფი დღეს თავად რაულ ლომთაძეს გაესაუბრა, რომელმაც აქციაში მონაწილეობა მართლაც დაადასტურა და პირად ინტერესებს დაუკავშირა.

აქტივისტები ამბობენ, რომ ჰესის მშენებელი კომპანია კონკრეტულ უბანზე სამუშაოს ისე აწარმოებს, რომ მიწა არა კომპანიის, არამედ მისი კანონიერი მეპატრონის მფლობელობაშია. „ენკაში“ კი განმარტავენ, რომ კომპანიამ ყველა ის მიწა გამოისყიდა, რომელიც მშენებლობის მასშტაბებს მოიცავს. ჰესის მშენებელ კომპანიაში ამბობენ, რომ ამ დროისთვის კომპენსაცია 261 ოჯახზე გაიცა, თანხის მოცულობა კი 35 მილიონს ლარს შეადგენს. მოლაპარაკებები დასრულებულია კიდევ 13 ოჯახთან და ახლა მხოლოდ ფორმალური პროცედურები მიმდინარეობს. ჰესის მშენებელ კომპანიაში აცხადებენ, რომ მიწის ყველა ის მონაკვეთი, სადაც კომპანია მოსამზადებელ სამუშაოს ასრულებს, მათ კანონიერ მფლობელობაშია.

ჰიდროელექტროსადგურის მშენებლობის წინააღმდეგ მიმართული აქციის მონაწილეები საპროტესტო აქციების თბილისში გამართვას აანონსებენ.