კახა კუჭავა: დარწმუნებული ვარ, გიორგი ონიანი ოთხი წლის განმავლობაში შეძლებს, მოაგვაროს ყველა ის გამოწვევა, რომლის წინაშეც დგას მუნიციპალიტეტი

მნიშვნელოვანია ახალგაზრდული ხედვა და ჟინი, რომელიც აუცილებელია, რომ რეგიონმა უფრო მეტი განვითარება პოვოს. ასეთია ჩვენი კანდიდატი, რომელიც დაუბრუნდა თავის მშობლიურ კუთხეს და დარწმუნებული ვარ, ოთხი წლის განმავლობაში შეძლებს, ბოლომდე მოაგვაროს ყველა ის გამოწვევა და პრობლემა, რომლის წინაშეც დგას ეს მუნიციპალიტეტი, - ამის შესახებ პარლამენტის თავმჯდომარემ, კახა კუჭავამ „ქართული ოცნების“ ლენტეხის მერობის კანდიდატის, გიორგი ონიანის წარდგენაზე განაცხადა.

მან ლენტეხის კიდევ უფრო მეტად ეკონომიკური განვითარების მნიშვნელობაზე ისაუბრა და მოსახლეობას ასევე კიდევ ერთხელ მოუწოდა ვაქცინაციისკენ, რათა ის გამოწვევები დაძლიონ, რასაც პანდემია ქმნის.

„ლენტეხელებო, მოგესალმებით, მივესალმები ამ ულამაზეს კუთხეს. ლამაზად და ამაყად დგას ჩვენ უკან სვანური კოშკი. ასე ამაყად და შეუპოვრად დგახართ აქ მცხოვრებლები. ეს მაღალმთიანი რეგიონია, იცის ძალიან მძიმე ზამთარი და არის ბევრი გამოწვევა, რომელსაც თქვენ ყოველდღიურად უმკლავდებით, ზაფხულია თუ ზამთარი.

მახსოვს, როდესაც ვსტუმრობდი აქ, ულამაზეს სოფლებს, ბევრს ვესაუბრეთ, თუ რა იყო ის ყოველდღიური გამოწვევა და პრობლემა, რომელიც საჭიროებდა გადაჭრას. ვიცი, ბევრი გაკეთდა, ბევრი პრობლემა მოგვარდა, თუმცა, ეს ისეთი რეგიონია, მაღალმთიანი, სადაც გამოწვევები ყოველთვის იქნება და აუცილებელია, ეფექტიანად მივხედოთ და მოვაგვაროთ ეს პრობლემები.

ამიტომ, მნიშვნელოვანია ახალგაზრდული ხედვა და ჟინი, რომელიც აუცილებელია, რომ რეგიონმა უფრო მეტი განვითარება პოვოს. ასეთია ჩვენი კანდიდატი, რომელიც დაუბრუნდა თავის მშობლიურ კუთხეს და დარწმუნებული ვარ, ოთხი წლის განმავლობაში შეძლებს, ბოლომდე მოაგვაროს ყველა ის გამოწვევა და პრობლემა, რომლის წინაშეც დგას ეს მუნიციპალიტეტი.

როდესაც ვსაუბრობთ ლენტეხზე, რატომღაც ყოველთვის გზის ბოლოდ აღიქმებოდა-ხოლმე იგი და ეს ბუნებრივია, თუმცა, ეს არის დროებითი. ვიცით, რომ დასრულდება მალე გზა, რომელიც უშგულსა და შემდეგ მესტიასთან მიაერთებს ამ მონაკვეთს და კიდევ მეტ პოტენციალსა და შესაძლებლობას გააჩენს ლენტეხისთვის არა მხოლოდ ტურიზმის, არამედ სხვადასხვა მიმართულებით, რათა გაჩნდეს ბევრი ახალი საინფორმაციო, ტურისტული ცენტრი და მეტი სარგებელი მიიღოთ. მეტი ჩართულობა და დასაქმება, ეს არის რაც სჭირდება თითოეულ რეგიონს.

არ შემიძლია არ ვახსენო ის მთავარი გამოწვევა, რომლის წინაშე არა მხოლოდ ჩვენი ქვეყანა, არამედ მთელი მსოფლიო დგას - კოვიდპანდემია. ერთადერთი გამოსავალი არის, ავიცრათ. ეს არის ჩვეულებრივი აცრა, როგორც ვიცრებით ნებისმიერი ვირუსის დროს, მათ შორის ბავშვობაში და აუცილებელია, აცრა გავიკეთოთ, რომ შევძლოთ ჩვენი თავის, ახლობლების, ოჯახების დაცვა.

მოგიწოდებთ და გთხოვთ ყველას, მეტად ჩაერთოთ ვაქცინაციის პროცესში. მხოლოდ ამ გზით შევძლებთ, დავძლიოთ პანდემია, დავუბრუნდეთ ჩვეულებრივ დღის წესრიგს, სამუშაო რეჟიმსა და შევძლოთ მეტი გავაკეთოთ ჩვენი კუთხისთვის, ქვეყნისთვის.

ერთი თვეც აღარ დარჩა არჩევნებამდე და ყველა ხედავს, რომ „ქართულ ოცნებას“ არ აქვს ალტერნატივა. ჩვენ ვართ ძლიერი გუნდი და დარწმუნებული ვარ, აუცილებლად გავიმარჯვებთ, შევძლებთ იმ მნიშვნელოვანი ინფრასტრუქტურული და სხვა დაწყებული პროექტების გაგრძელებასა და დასრულებას, რომელიც ემსახურება თითოეული რეგიონის სიძლიერეს, რაც საწინდარია საქართველოს სიძლიერის“, - განაცხადა კახა კუჭავამ.