ვინ არის ადამიანი, რომელმაც ტექნიკის საწყობში სავარაუდოდ ცეცხლი გააჩინა

დიდ დიღომში, ტექნიკის საწყობში 2 მილიონ დოლარზე მეტი ღირებულების ტექნიკა სავარაუდოდ განზრახ დაწვეს. "ქრონიკის" ინფორმაციით, ხანძრის შედეგად დაშავებული 36 წლის ზ.მ. ერთ-ერთი ბრალდებულია.

შსს ინფორმაციას ჯერ არ ადასტურებს, თუმცა "ქრონიკამ" გაარკვია, რომ დაშავებული რეანიმაციულ განყოფილებაში ძალოვანი უწყების წარმომადგენელთა მეთვალყურეობის ქვეშ არის.

გამოძების ფარგლებში ის მესაკუთრეებიც გამოიკითხნენ, რომელთა პროდუქციაც დაიწვა. 

ვინ არის ხანძრის შედეგად დაშავებული ზ.მ.  - არ იციან არც დამწვარი საწყობის მფლობელებმა და არც საწყობში არსებული ინვენტარის მესაკუთრეებმა. "ქრონიკის" ინფორმაციით კი, ზ.მ.-მ საღამოს ათი საათისთვის შეაღწია ტექნიკის საწყობში, ინვენტარს წაუკიდა ცეცხლი და სიმაღლიდან გადახტა, რა დროსაც მან მიიღო მძიმე მოტეხილობა წვივის არეში. 

ამის შემდეგ მან, სავარაუდოდ, გონება დაკარგა და სახანძრო სამსახურის წარმომადგენლებმა ცეცხლმოკიდებული შენობიდან გამოიყვანეს. ამ ინფორმაციას შინაგან საქმეთა სამინისტროში არ ადასტურებენ, თუმცა, დაშავებული კლინიკაში ძალოვანი უწყების წარმომადგენლების მეთვალყურეობის ქვეშ არის, გაძლიერებულია უსაფრთხოების ნორმები, ასევე, მკაცრად კონტროლდება, თუ ვინ შედის პაციენტთან რეანიმაციულ განყოფილებაში.

საწყობში გაჩენილი ხანძრის გამოძიების ფარგლებში, "ქრონიკის" ინფორმაციით, უკვე გამოიკითხა საწყობის დარაჯი და ის არ იცნობს ზ. მ.-ს, არც ის იცის, თუ როგორ მოხვდა იგი ღამის საათებში საწყობში. ასევე, დღეს დილით გამოიკითხა ერთ-ერთი კომპანიის დირექტორი პაატა ნოზაძე, რომელსაც ჰქონდა დასაწყობებული ტექნიკა. ის "ქრონიკასთან" საუბარში ამბობს, რომ გამოძიების მთავარი კითხვები უკავშირდებოდა დაშავებულ ზ.მ.-ს, თუმცა მასაც არ აქვს ინფორმაცია ამ ადამიანის ვინაობის შესახებ.

რაც შეეხება ხანძრის განგებ გაჩენის სავარაუდო მოტივს, დაზარალებულ ბიზნესმენთა ნაწილი აცხადებს, რომ შენობის მფლობელებს შორის უკვე წლებია არსებობს უთანხმოება. მიმდინარეობს სასამართლო დავები და ისინი ვარაუდობენ რომ შესაძლოა ეს დავა ხანძრის განგებ გაჩენას უკავშირდებოდეს.

შემთხვევის ადგილზე საგამოძებო მოქმედებები ამ წუთებშიც მიმდინარეობს. ოფიციალური ინფორმაციით, ჯერ დაკავებული არავინ არის, გამოძიება კი 187-ე მუხლის მეორე ნაწილით მიმდინარეობს, რაც ცეცხლის წაკიდებით ნივთის დაზიანებას ან განადგურებას გულისხმობს. დამწვარ ტერიტორიაზე ექსპერტ-კრიმინალისტებმა მუშაობა უკვე დაიწყეს.