ლევან ვასაძის გამოკითხვა დასრულდა

ბიზნესმენმა ლევან ვასაძემ პოლიციის შენობა უკვე დატოვა. მან მედიის შეკითხვებს არ უპასუხა და თქვა, რომ ახლა მის გამოკითხვაზე უფრო მნიშვნელოვანი პარლამენტთან მიმდინარე აქციაა. 

"რა კითხვები ჰქონდათ, ეს თავად გითხრან. ყველაფერზე გავეცი ამომწურავი პასუხები, არავითარი წინააღმდეგობა ამ გამოკითხვაში არ გამიწევია, რაც აინტერესებდათ ყველაფერი ავუხსენი. აინტერესებდათ ის, რაც არის მეორეხარისხოვანი იმასთან შედარებით, რაც ამავე ხელისუფლების უნიათო და უნიჭო მმართველობის შედეგად ხდება ამჟამად რუსთაველის გამზირზე. ეს არის ტრაგედია ჩვენი ერის, მე ვრჩები იმ აზრზე, რომ ეს ორი მოვლენა არის ერთი ჯაჭვის რგოლები, დაიწყო „პრაიდით“ და გაგრძელდა იქ. ეს არის მიზანმიმართული ერთიანი პროვოკაცია, რომელიც აბსოლუტურად უნიჭოდ იმართება და მიზნად ისახავს ქართული სახელმწიფოს როგორც მინიმუმ დესტაბილიზაციას.

მე არ მაინტერესებს ამაში მონაწილე ადამიანები არიან „ნაცები“ თუ „ქოცები“, უნდა ჩატარდეს გამოძიება. მე გავრილოვის ტუტუც გამოხტომაზე უკვე გავაკეთე კომენტარი. მიმაჩნია, რომ თითოეული მონაწილე უნდა დაისაჯოს ქართული კანონმდებლობის უმკაცრესი სტანდარტებით. მე არ ვიცი, ვინ რა თქვა, მაგრამ ქართველი ხალხი რომ იჩაგრება, ასეთ სისხლისღვრა რომ ხდება, ყველა დამნაშავეა ამ პროცესში. თქვენ თუ ჩემგან ელოდებით მოწოდებებს, რომ მთავრობა უნდა გადადგეს, პარლამენტი უნდა ვადამდელი არჩევნებით დაიშალოს, ვიდრე გამოძიება არ გაარკვევს, ვინ არის ის დივერსანტი, ვინც ქართველ ხალხს ასე აწამებს, ვინც მის ნებას ასე აფურთხებს, ვინც მის ნებას ასე ფეხებზე იკიდებს, აი ახლა ცრემლები მადგება ძლივს ვლაპარაკობ, ვინც ტყვიებს ესვრის, ქუჩებში აკოტრიალებს, სულში აფურთხებს და ეუბნება ხან „პრაიდს“ და ხან რუს დეპუტატს დაგიჯენენ თავმჯდომარის სკამში. მე მაგ გამზირზე როცა მკლავდნენ, რუსი „სალდათები“ ცხრა აპრილს, მე ვიცოდი, რას ვიცავდი მე ვიცოდი ვის ვებრძოდი, მე ვიცავდი იმ ღამეს ჩვენს ქალებს. 16 ქალი მოგვიკლეს მაშინ, მე მომიკლეს ასე ვთვლი, ესენი რას შვებიან“, - განაცხადა ლევან ვასაძემ.

ლევან ვასაძის პოლიციის მთავარ სამმართველოში მისვლამდე სამართალდამცველებმა გურამ ფალავანდიშვილი პოლიციისთვის წინააღმდეგობის გაწევის ბრალდებით   დააკავეს. თუმცა რამდენიმე საათის წინ ფალავანდიშვილი გათავისუფლდა, სასამართლო პროცესი კი რამდენიმე დღით გადაიდო.

ფალავანდიშვილის ადვოკატის დავით ცინცქალაძის განცხადებით, დაცვის მხარემ ადმინისტრაციული საქმის მასალების გაცნობის მიზნით საქმის განხილვის გადადების შუამდგომლობა დააყენა.

თუმცა, შსს-ს განმარტებით, ფალავანდიშვილმა სამართალდამცველებს წინააღმდეგობა გაუწია და სიტყვიერი შეურაცხყოფა მიაყენა. პოლიციამ ის ადმინისტრაციულ სამართალდარღვევათა კოდექსის 173-ე მუხლით დააკავა, რაც პოლიციელის კანონიერი მოთხოვნისადმი დაუმორჩილებლობას გულისხმობს.

შსს-მ ლგბტქ პრაიდის წინააღმდეგ ლეგიონის შექმნის შესახებ ლევან ვასაძის განცხადების შემდეგ გამოძიება დაიწყო.

თბილისში "თბილისის პრაიდის" კვირეული მიმდინარეობს, რომელსაც საზოგადოებაში მოწინააღმდეგეები ჰყავს. გაჟღერებული მუქარის მიუხედავად, პრაიდის ორგანიზატორები გეგმების შეცვლას არ აპირებენ. 

„ქართული მარში“ „თბილისი პრაიდის“ ორგანიზატორებს სიურპრიზს დაჰპირდა.

ბიზნესმენ ლევან ვასაძის თანამოაზრეებს, რომლებიც „თბილისი პრაიდის“ წინააღმდეგ გამოდიან, ვერის ბაღში „ქათული მარშის“ წევრები შეუერთდნენ და აქციის მონაწილეებს თანადგომა გამოუცხადეს.

ორგანიზაციის ლიდერმა, სანდრო ბრეგაძემ განაცხადა, რომ არც ერთ ქართველს არ აქვს უფლება ამ დროს განზე გადგეს. 

ლგბტ-პრაიდთან დაკავშირებით საპატრიარქომ უკვე მესამე განცხადება გაავრცელა. 17 ივნისს გავრცელებულ განცხადებაში ნათქვამი იყო, რომ ლგბტ მცირე ჯგუფის გამოყენება გარკვეული მიზნებისთვის არაერთ ძალას სურს.

14 ივნისს კი საპატრიარქომ მოუწოდა ხელისუფლებას, არ დაუშვას ლგბტ პრაიდის ჩატარება. ამის გამო, ლგბტ თემის წარმომადგენლებმა და მათმა უფლებადამცველებმა აქცია გამართეს. გაიმართა კონტრაქციაც. 

კონტრაქციაზე მივიდა ლევან ვასაძეც, რომელმაც განაცხადა, რომ პრაიდის ჩატარებას არც ერთ შემთხვევაში არ დაუშვებს. ამ ორ საპროტესტო აქციას, ერთმანეთისგან პოლიციის კორდონი ჰყოფდა.