მელია: მათთვის მე დაჭრილი ვარ, დაჭრილი მხეცი უფრო საშიშია

„ნაციონალური მოძრაობის“ წევრი ნიკა მელია დღეს სააპელაციო სასამართლოში მიმდინარე პროცესს გამოეხმაურა. მელიას განცხადებით, მის წინააღმდეგ არანაირი მტკიცებულება არ არის და სააპელაციო სასამართლოს გირაოს ნაცვლად პატიმრობის გამოყენების წინაპირობა არ აქვს. მელია ამბობს, რომ მიმდინარე სასამართლო პროცესების ერთადერთი მიზანი მისი პოლიტიკურად განეიტრალებაა.

„მათ ეგონათ, რომ მე ვეღარ შევძლებდი პარლამენტში სიარულს, როგორც მოქმედი დეპუტატი. მათთვის მე დაჭრილი ვარ. დაჭრილი მხეცი უფრო საშიშია. დაახლოებით ასე უყურებენ. წარმოუდგენელი რამ გააკეთებინეს, მტკიცებულებები არ არსებობდა. უნდოდათ ძალიან, რომ შედეგი დამდგარიყო პატიმრობა. სიჩქარეში ვერ გათვალეს ბევრი რამ და ახლა არიან ჩიხში, მაგრამ ეს ჩიხი, როგორც ჩანს, უფრო ღრმა არის, ვიდრე მათ ჰგონიათ", - განაცხადა ნიკა მელიამ.

ნიკა მელიას საქმეზე სააპელაციო სასამართლოში პროცესი მიმდინარეობს. მოსამართლე პირველი ინსტანციის განჩინებაზე მსჯელობს. ზემდგომ ინსტანციას საჩივრით მიმართა როგორც დაცვის, ასევე ბრალდების მხარემ. საგამოძიებო უწყება ნიკა მელიასთვის აღკვეთის ღონისძიების სახით 30-ათასი ლარის გირაოს შეფარდებას ასაჩივრებს და პატიმრობას ითხოვს.

გენერალური პროკურატურის საპროკურორო ზედამხედველობის სამმართველოს უფროსი ამირან გულუაშვილი აცხადებს, რომ სააპელაციო სასამართლოსგან „ერთიანი ნაციონალური მოძრაობის“ წევრის, ნიკა მელიასთვის აღკვეთის ღონისძიებად პატიმრობის შეფარდებას მოითხოვენ.

„ნიკა მელიასთვის გირაოს შეფარდება უსამართლოდ მიგვაჩნია. რა ღონისძიებაც არ უნდა იყოს გამოყენებული გირაოსთან ერთად, ვერ უზრუნველყოფს აღკვეთის ღონისძიების მიზნების მიღწევას. სწორედ ამის გამო, გავასაჩივრეთ ნიკა მელიასთვის გირაოს შეფარდების გადაწყვეტილება და სასამართლოსგან მოვითხოვთ, რომ მას აღკვეთის ღონისძიების სახით პატიმრობა შეეფარდოს“, - განუცხადა ჟურნალისტებს ამირან გულუაშვილმა.

რაც შეეხება ოპოზიციონერი დეპუტატის ინტერესების დამცველს, ადვოკატი აცხადებს, რომ საქალაქო სასამართლომ მისი განჩინებით ნიკა მელიას შეუზღუდა სადეპუტატო უფლებამოსილება, რაც წინააღმდეგობაში მოდის კონსტიტუციასთან.

27 ივნისს მელიას აღკვეთის ღონისძიების სახით 30-ათასლარიანი გირაო შეეფარდა.

26 ივნისს საქართველოს პარლამენტმა მელიას სადეპუტატო იმუნიტეტი შეუჩერა, გენერალურმა პროკურატურამ კი 25 ივნისს მას ბრალი წაუყენა. როგორც პროკურორმა განაცხადა მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები.

21 ივნისს შინაგან საქმეთა სამინისტროში ბრიფინგი გაიმართა, რომელზეც ითქვა, რომ ჯგუფური ძალადობის ორგანიზების საქმეზე გამოკითხვაზე დაიბარეს ნიკა მელია, გიგი უგულავა და ირაკლი ოქრუაშვილი. საქმე ეხება 19-20 ივნისის საპროტესტო აქციას.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.