გვარამია მაგისტრატი მოსამართლის თანდასწრებით ხვალ 11:00 საათზე გამოიკითხება

გენერალურმა პროკურატურამ მიმართა სასამართლოს ტელეკომპანია „რუსთავი 2“-ის ყოფილი გენერალური დირექტორის ნიკა გვარამიას გამოკითხვასთან დაკავშირებით და ის თბილისის საქალაქო სასამართლოში მაგისტრატი მოსამართლის თანდასწრებით ხვალ 11:00 საათზე გამოიკითხება. 

„რუსთავი 2“-ის კონტრაქტორი საწარმო „ინტერ მედიაში“ 4 საათზე მეტხანს მუშაობდნენ. ბოლო 6 წლის ფინანსური დოკუმენტაცია საწარმოებიდან გენერალური პროკურატურის თანამშრომლებმა მოსამართლის განჩინების საფუძველზე ამოიღეს. 

,,სამაუწყებლო კომპანია „რუსთავი 2“-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე მიმდინარე გამოძიების ფარგლებში, პროკურატურის შუამდგომლობის საფუძველზე მიღებულია სასამართლოს შესაბამისი განჩინებები", - ნათქვამია პროკურატურის მიერ გავრცელებულ განცხადებაში.

უწყებაში ამბობენ, რომ საქმეზე გამოძიების დაწყებას საფუძვლად დაედო „რუსთავი 2“-ის 9%-იანი წილის ყოფილი მფლობელის ნინო ნიჟარაძის უფლებადამცველის გიორგი ყავლაშვილისა და ტელეკომპანიის ამჟამინდელი გენერალური დირექტორის პაატა სალიას განცხადებები ტელეკომპანიაში შექმნილ რთულ ფინანსურ ვითარებასთან დაკავშირებით. 

ნინო ნიჟარაძის უფლებადამცველმა გენერალურ პროკურატურაში განცხადება 16 ივლისს შეიტანა. ყავლაშვილის განცხადებით, ნიკა გვარამიამ ტელეკომპანია 30-50 მილიონ ლარამდე შემოსავლით მიზანმიმართულად აზარალა, ეს თანხა კი ტელევიზიის ნაცვლად 2015-2017 წლებში სარეკლამო კომპანია „ინტერ მედიამ“ მიიღო.

ტელეკომპანიის ყოფილი გენერალური დირექტორი გამოძიებას უწყებას უნდობლობას უცხადებს, თუმცა ამბობს, რომ თადუმაძის უწყების კითხვებზე პასუხის გაცემის არ ეშინია, ვინაიდან ის მართალია.

„ცხადია, სასამართლოში მივალ. არ ვიცი, რაზე დამკითხავს სასამართლო, მაგრამ მზად ვარ ვისაუბრო იმაზე, რაც ვიცი. როცა მართალი ვარ და მორალური უპირატესობა მაქვს, მაშინ არაფრის მეშინია“, - აცხადებს გვარამია.

გენერალურმა პროკურატურამ სამაუწყებლო კომპანიის კონტრაქტორი საწარმოებიდან, მათ შორის „ინტერ მედია“ და „ინტერ მედია პლიუსიდან“ გამოძიებისათვის საჭირო ფინანსური დოკუმენტაცია უკვე ამოიღო. საუბარია 2013 წლიდან დღემდე შესრულებულ ტრანზაქციებზე.

ფინანსური კუთხით ძალიან არასახარბიელო სიტუაცია დაგვხვდა, ამის შესახებ მე პირველივე დღეებში განვაცხადე. ძალიან დიდი დავალიანებებია არა მხოლოდ ბიუჯეტის მიმართ, არამედ სხვა კონტრაქტორებთანაც. შესაძლოა, აქ განხორციელებულია გარკვეული მოქმედებები წინა მენეჯმენტის მიერ, რაც არ მოდის შესაბამისობაში კანონმდებლობასთან. სულ გვესმოდა ყბადაღებული ყადაღის თემა, თითქოს ყადაღამ ჩააგდო კომპანია ასეთ მდგომარეობაში, რაც აბსურდია და წარმოუდგენელია“, - განაცხადა პაატა სალიამ.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.