ნიკა გვარამიას გრიფით „საიდუმლო“ საქმეზე გამოკითხვა დასრულდა

საქალაქო სასამართლოში „მთავარი არხის“ დირექტორის ნიკა გვარამიას გამოკითხვა გრიფით „საიდუმლო“ საქმეზე დასრულდა. „დამისვეს კითხვები რა ვიგულისხმე დამხობაში და უზურპატორში და თუ ეს არ იცოდნენ საერთოდ ჩემი გამოკითხვა რატომ დაიწყეს. განვმარტე რატომ არ არის ბიძინა ივანიშვილის დამხობა ხელისუფლების დამხობა“, - ეს განცხადება გვარამიამ მედიასთან სასამართლოდან გამოსვლისას გააკეთა.

გვარამიას განცხადებით, გრიფით „საიდუმლო“ იმიტომ დაადეს ამ საქმეს, რომ შეიცავს საიდუმლო ინფორმაციას, თუმცა საქმეში ჯერ-ჯერობით, მხოლოდ მის მიერ სოციალურ ქსელში გამოქვეყენბული სტატუსი დევს. მისი თქმით, სასამართლო აბსურდულად და კონსტიტუციის დარღვევით იყენებს „გრიფით საიდუმლოს“ სტატუსს.

გვარამიამ ასევე მედიასთან იმაზეც ისაუბრა, თუ რა განმარტებები მისცა სასამართლოს სოციალურ ქსელში გამოქვეყნებულ სტატუსზე: 

„დამხობა, თან უზურპატორის ნიშნავს მის გაწევას, იქიდან რაც არ მიუნიჭებია ერთადერთ შესაძლო წყაროს. ანუ საქართველოს ხალხს მისთვის არ მიუნიჭებია იყოს საქართველოს ხელისუფლება. და ის დღეს ეფექტურად და არა ფორმალურად არის საქართველოს ხელისუფალი. ის ახორციელებს საქართველოს ხელისუფლების ფუნქციებს. რატომ არის ეს უკანონო? ამას შეიძლება ახორციელებდეს ქართველო ხალხის მიერ არჩეული ან დანიშნული წარმომადგენლობითი ორგანო. ეს არის სახელმწიფო მიტაცება და განგრძობითი უზურპაციის მცდელობა. მე ძალადობა არ მიყვარს. ის რასაც ირჩევენ, ის იცვლება არჩევნებით. როცა აირჩიეს მძიმე შეცდომა იყო. ალტერნატივა იმ წუთისთვის არ ჰქონდა საქართველოს  მოსახლეობას. ვინ უნდა ქართველ ხალხს ეს უნდა გაირკვეს არჩევნების გზით“, - განაცხადა გვარამიამ. 

გამოძიება 317-ე მუხლით მიმდინარეობს, რაც სამწლამდე თავისუფლების აღკვეთას გულისხმობს. 

ნიკა გვარამიამ Facebook-ის გვერდზე სტატუსი 4 დეკემბერს გამოაქვეყნა.  „მთავარი არხის“ გენერალურმა დირექტორმა სტატუსში დაწერა, რომ „ქართველმა პატრიოტმა მედასავლეთეებმა“ მოქმედი ხელისუფლება უნდა დაამხონ. ეს მოწოდება სოციალურ ქსელში ექსპრეზიდენტმა მიხეილ სააკაშვილმაც გააზიარა.

„მთავარი არხის“ დამფუძნებელს საქალაქო სასამართლოში, მაგისტრატი მოსამართლის წინაშე დაკითხეს. 

ნიკა გვარამია კონკრეტულ სისხლის სამართლის საქმეზე დაიკითხება, რომელსაც გრიფი „საიდუმლო“ ადევს, - ამის შესახებ „მთავარი არხის“ დირექტორის საქმის პროკურორმა, ელიზბარ გოზალიშვილმა ჟურნალისტებს განუცხადა.   

მისივე თქმით, დანარჩენ დეტალებზე პროცესის დასრულების შემდეგ ისაუბრებს.

„ნიკა გვარამიას მოწმის სახით, პროკურატურის შუამდგომლობის საფუძველზე, დღეს თბილისის საქალაქო სასამართლოში მაგისტრატი მოსამართლის წინაშე დაკითხავენ. რაც შეეხება დაკითხვას, მას  განახორციელებს სახელმ წიფო უსაფრთოების სამსახურის გამომძიებელი. ნიკა გვარამია დაიკითხება კონკრეტულ სისხლის სამართლის ს აქმეზე, რომელსაც ადევს გრიფი „საიდუმლო“, შესაბამისად, საქმის დეტალებთან დაკავშირებით ვერ ვისაუბრებ“, - განაცხადა ელიზბარ გოზალიშვილმა.

პირველ ნოემბერს პროკურატურამ გვარამიას ახალი ბრალდება 76 700 ევროდ ღირებული ავტომობილის ეპიზოდზე წარუდგინა.

6 სექტემბერს ნიკა გვარამიას კიდევ ერთი ბრალი წარედგინა. ახალი ბრალის ერთ-ერთი ეპიზოდის თანახმად, გენერალური პროკურატურა „რუსთავი 2“-ის ყოფილ დირექტორს, ნიკა გვარამიას დიდი ოდენობით უძრავი ქონების უკანონოდ დაუფლებას ედავება.

11 აგვისტოს სასამართლომ ნიკა გვარამიას 40 000 ლარის გირაო შეუფარდა, რომელიც გვარამიამ 9 სექტემბერს გადაიხადა.