პროკურატურაში „რუსთავი 2“-ის ყოფილ ფინანსურ დირექტორს კითხავენ

უკვე ერთი საათია, გამომძიებლების შეკითხვებს „რუსთავი 2-ის“ ყოფილი ფინანსური დირექტორი კახა დამენია პასუხობს. ის მთავარ საგამოძიებო უწყებაში „რუსთავი 2-სა“ და „ინტერმედიას“ შორის ფინანსური ოპერაციების დეტალების გასარკვევად დაიბარეს.

დამენია ტელეკომპანიის ფინანსურ სამსახურს 2015 წელს ხელმძღვანელობდა. როგორც კახა დამენიამ გენერალურ პროკურატურაში შესვლამდე „კურიერს“ განუცხადა, მას დანაშაული არ ჩაუდენია და მზად არის, გამოძიების ყველა შეკითხვას უპასუხოს.

„ნებისმიერ კითხვაზე გავცემ პასუხს იმიტომ, რომ ყველაფერი იყო წესრიგში და დასამალი არაფერი მაქვს. იურიდიულადაც და ფინანსურადაც ყველაფერი იყო აბსოლუტურად გამართული და სწორი. ჩემი იქ ყოფნის პერიოდში არათუ დანაშაულს, გადაცდომასაც კი გამოვრიცხავ. მოწმის სტატუსით ვარ დაბარებული, მაგრამ სტატუსის ცვლილებას არ ველოდები იმიტომ, რომ ძალიან თეთრი ბრჭყვიალა ძაფით უნდა შეიკეროს საქმე, რომ რაიმე სამართლებრივი პრობლემა აღმოაჩინონ ამ პერიოდზე“, - განაცხადა კახა დამენიამ.

დამენიას ადვოკატი ბექა ბასილაია აცხადებს, რომ მიმდინარე პროცესები მედიაზე ზეწოლის მცდელობას უკავშირდება. მისივე თქმით, რომ გამოძიებისთვის ისედაც ცხადია, რომ „რუსთავი 2-სა“ და „ინტერმედიას“ შორის, ფინანსური ოპერაციები კანონიერი და გამჭვირვალე იყო. 

„მკაფიოდ ჩანს, რომ ამ საქმის მთელი მოტივაცია არის მედიასთან დაკავშირებული საკითხები და არა ფინანსური საკითხები, არა რომელიღაც მინორი დამფუძნებლის პრეტენზიები და ა.შ. ყველა კითხვაზე არსებობს გამჭვირვალე, ღია პასუხები. უფრო მეტიც, ყველა ის საკითხი, რასაც თითქოს პროკურატურა სწავლობს, დადეკლარირებულია, გადასახადები გადახდილია და არაფერი არ არის დაფარული. გამოძიებას სურს, რომ ამ პროცესს პიარის თვალსაზრისით მაინც მიაბას გარკვეული ადამიანები, რაც მომავალში შეიძლება გამოყენებული იყოს მედიაზე ზეწოლისთვის“, - აცხადებს ბექა ბასილაია.

1 აგვისტოს „რუსთავი2“-ის კონტრაქტორ „ინტერმედიის“ სათავო ოფისიდან პროკურორებმა დოკუმენტაცია წაიღეს და მისი შესწავლა დაიწყეს. საუბარია 2013 წლიდან დღემდე შესრულებულ ტრანზაქციებზე. იმავე დღეს გენერალურ პროკურატურაში მიმდინარე გამოძიების ფარგლებში „ინტერმედიას“ დირექტორი ზურაბ იაშვილი დაკითხეს.

2 აგვისტოს კი მაგისტრატი მოსამართლის თანდასწრებით ტელეკომპანიის ყოფილი დირექტორი ნიკა გვარამია დაიკითხა. მისი თქმით, გამოძიების მთავარი ინტერესია, რატომ ფორმდებოდა სარეკლამო კონტრაქტები ამა თუ იმ თანხაზე.