ბადრი ჯაფარიძე: ფინანსურმა სამსახურმა ბრიტანეთს ჩვენი ანგარიშების შემოწმება და დაყადაღება მოსთხოვა

ფინანსური მონიტორინგის სამსახურმა ბრიტანეთს ანტიტერორისტული თანამშრომლობის ფარგლებში მიმართა და ჩვენი ანგარიშების შემოწმება და დაყადაღება მოსთხოვა, - ამის შესახებ „თიბისი ბანკის“ ერთ-ერთმა დამფუძნებელმა ბადრი ჯაფარიძემ სპეციალურად გამართულ ბრიფინგზე განაცხადა. 

მისი თქმით, ფინანსურმა სამსახურმა ამით ეჭვი გამოთქვა, რომ მისი და ხაზარაძის ფულადი სახსრები კრიმინალური წარმოშობისაა. 

„ფინანსური მონიტორინგის სამსახურმა ბრიტანეთის შესაბამის სამსახურს მიმართა, რომ თურმე მე და მამუკა ხაზარაძე ეჭვმიტანილი ვართ ფულის გათეთრებაში და ფულადი სახსრები, რომელზეც ეჭვობენ, რომ  შეიძლება ბრიტანეთში იყოს, ასევე ეჭვი აქვთ, რომ კრიმინალური წარმოშობისაა. ბრიტანელი კოლეგები, რა თქმა უნდა, ამას სერიოზულად იღებენ და ვერ წარმოიდგენენ, რომ ეს პოლიტიკური დევნის ელემენტია. ნაბიჯი ემსახურება ერთ მიზანს - ჩვენი კანონიერი სახსრების ბლოკირებას ბრიტანეთში. ამისთვის გამზადებულია სასამართლოს მიერ დამტკიცებული ყადაღის გადაწყვეტილება, რადგან ჩვენმა სასამართლომ იმის ნაცვლად, რომ პროკურატურის მოთხოვნა გადაემოწმებინა, ყადაღის მოთხოვნა იყო თუ არა სამართლებრივი, პირდაპირ დაადასტურა ეს მოთხოვნა, რომელსაც ბრიტანეთში გადააგზავნიან. 

ვაპირებთ ნაბიჯები ისე გადავდგათ, რომ კითხვები არ დარჩეს ამ კონკრეტული საქმის მიზეზებთან და შინაარსთან დაკავშირებით. ამიტომ მეგობარ ქვეყნებს ვთხოვთ, რომ აქტიურად ჩაერთონ ამ პროცესში, რადგან ყველაზე დიდი იარაღი, რაც გვაქვს, არის სიმართლე და გამჭვირვალობა. უკეთესი იქნება თუ მეგობარი ქვეყნების შესაბამისი სამსახურებიც ჩაერთვებიან იმ ბრალდებების შესწავლაში, რაც ჩვენ მიმართ შეთითხნეს“, - აღნიშნა ჯაფარიძემ. 

„თიბისი“ ბანკის დამფუძნებელ მამუკა ხაზარაძის განცხადებით, ანგარიშის დაყადაღება და გაჩერება ნიშნავს იმას, რომ იმ ვალებს თუ ხელფასებს ვერ მოემსახურებიან, რომლითაც ანაკლიის პროექტს აფინანსებენ.

„ჩვენი მიზანია ეს პროექტი დავასრულოთ. მას აუცილებლად ავაშენებთ. საზოგადოებრივ მოძრაობას უახლოეს მომავალში დავაფუძნებთ და მის მიმართ ძალიან დიდი ინტერესია. თითოეულ კონტრაქტსა და გადარიცხვაზე ვართ პასუხისმგებელი. ივანიშვილს ვთავაზობ მოვიდეს ტელევიზაში, თუნდაც „იმედში“ და ვისაუბროთ ღიად - რა წინაპირობა და მოლაპარაკება იყო, რაც საზოგადოებამ არ იცის. დაადგეს ეს ქვეყანა გამჭვირვალობის გზას. გპირდებით ამ რეალობას შევცვლით“, - განაცხადა ხაზარაძემ. 

მოგვიანებით ამ საკითხზე კომენტარი სსიპ ფინანსური მონიტორინგის სამსახურის უფროსმა ვალერიან ხასაშვილმა გააკეთა. „უკაცრავად ვერანაირ კომენტარს ვერ მოგცემთ. ჯერ ერთი კონფიდენციალურია ყველანაირი ინფორმაცია, მეორეც, სისულელეზე კომენტარს ვერ გავაკეთებ“, - აღნიშნა ვალერიან ხასაშვილმა „ინტერპრესნიუსის“ შეკითხვის პასუხად.

მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით).“   

მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით თითოეულს 700 000 ლარიანი გირაო შეუფარდა. როგორც ცნობილია პროკურატურა მილიონიან გირაოს მოითხოვდა. 

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონი დოლარის ტრანზაქციაზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

ასევე, ამ საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას.