ბათუმში დაკავებული მაღალჩინოსნების აღკვეთის შეცვლაზე გადაწყვეტილება 15 ოქტომბერს გამოცხადდება

ბათუმის ყოფილი მერის გიორგი ერმაკოვის და მერიის ყოფილი მაღალჩინოსნების არჩილ ვანაძისა და ეგარსლან ლომიძის აღკვეთ ღონისძიებასთან დაკავშირებით სასამართლო გადაწყვეტილებას 15 ოქტომბერს 13:00 საათზე გამოაცხადებს. მოსამართლემ საქმის მასალების გასაცნობად დრო მოითხოვა.

ერმაკოვი, ვანაძე და ლომიძე პატიმრობის გირაოთი შეცვლას ითხოვენ და სასამართლოს 100-100 ათასი ლარის გარდა, ქონებით უზრუნველყოფასაც სთავაზობენ. მათი თქმით, მერიასთან მიღწეულია შეთანხმება, რომლის მიხედვითაც, გამამტყუნებელი განაჩენის შემთხვევაში, ზიანი ჩადებული ქონებიდან ანაზღაურდება.

„გაურკვეველია, რას ემსახურება თუმდაც ამ გადაწყვეტილების გამოცხადების გადადება. უპრეცენდენტო შემთხვევაა ქართულ სასამართლო სისტემაში, როდესაც ჩვენ დაზარალებულ მხარესთან, ბათუმის მერიასთან მივაღწიეთ შეთანხმებას - თუ ვინმეს მიმართ დადგება გამამტყუნებელი განაჩენი, ვალდებულებას ვიღებთ სახელმწიფოსთვის მიყენებული ზიანი ბოლომდე ავანაზღაუროთ. ამასთან ერთად, საერთო ჯამში გარანტიის უზრუნველყოფა მოხდა თითქმის მილიონ ლარზე მეტი ღირებულების უძრავი ქონებით“, - განაცხადა გიორგი ერმაკოვის ადვოკატმა ლევან მახარაშვილმა.

მოსამართლე დავით მამისეიშვილმა წინა პროცესზე გირაოს საფუძველზე ბათუმის მერიის 4 მაღალჩინოსანი გაათავისუფლა. ამ დრომდე პატიმრობაში რჩებიან ბათუმის ყოფილი მერი გიორგი ერმაკოვი, აჭარის ფინანსთა და ეკონომიკის მინისტრის ყოფილი მოადგილე არჩილ ვანაძე და ბათუმის მერიის ქონების მართვის სამსახურის ყოფილი უფროსი ეგარსლან ლომიძე.

მათ პროკურატურა სამსახურებრივი უფლებამოსილების ბოროტად გამოყენებისა და დიდი ოდენობის თანხის გაფლანგვას ედავება. საქმე ეხება „იაფი სახლის“ პროექტს. ბათუმში მაღალჩინოსნები 30 მაისს დააკავეს.