თემირლან მაჩალიკაშვილის საქმეზე შს მინისტრი ვახტანგ გომელაური გამოკითხეს

საქართველოს გენერალურ პროკურატურაში თემირლან მაჩალიკაშვილის საქმეზე შინაგან საქმეთა მოქმედი მინისტრი და სახელმწიფო უსაფრთხოების სამსახურის მაშინდელი ხელმძღვანელი, ვახტანგ გომელაური გამოკითხეს. 

მაჩალიკაშვილის საქმეზე ასევე დაიკითხა გომელაურის ყოფილი მოადგილე სოსო გოგაშვილი და სუსის ანტიტერორისტული ცენტრის ხელმძღვანელი ირაკლი ჩიმაკაძე. 

„თემირლან მაჩალიკაშვილის საქმის გამოძიების ფარგლებში ჩატარდა და ჩატარდება ყველა საგამოძიებო მოქმედება საქმეზე ჭეშმარიტების დადგენის მიზნით“, - აცხადებენ გენერალურ პროკურატურაში.

მათ გამოკითხვასთან დაკავშირებით "რუსთავი 2"-თან კომენტარი გააკეთა თემირლანის მამამ მალხაზ მაჩალიკაშვილმა: "რატომ წელიწადი და 10 თვის მერე? კონკრეტული ორი პირია, ვინც დაუშვა ეს შეცდომა, ვისაც შეეშალა ბინა, ვინც მოიპარა ყურსასმენები, ვინც ჩადო "ლიმონკა", ეს ორი ადამიანი არის იოსებ გოგაშვილი და ირაკლი ჩიმაკაძე. ნაძირალა ორივე, გახრწნილი. სახელმწიფომ უნდა აღიაროს დანაშაული", - თქვა მალხაზ მაჩალიკაშვილმა. 

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.

1 ოქტომბერს სტრასბურგის სასამართლომ მაჩალიკაშვილის საქმის არსებითი განხილვა დაიწყო.