საპატრულო პოლიცია აქციის მონაწილეებს აფრთხილებს

საქართველოს შინაგან საქმეთა სამინისტროს საპატრულო პოლიციის დეპარტამენტი აქციის მონაწილეებს მოუწოდებს, პარლამენტის ცენტრალური შესასვლელის პიკეტირება არ მოახდინონ. ამის შესახებ შსს-ს სამინისტროს საპატრულო პოლიციის დეპარტამენტის უფროსმა ვაჟა სირაძემ განაცხადა.

ვაჟა სირაძის თქმით, ამ დროისთვის არავინ დაუკავებიათ.

„მოვუწოდებთ ყველას, პარლამენტის ცენტრალური შესასვლელის პიკეტირება არ მოახდინონ. შეუძლიათ, გამოხატონ თავიანთი უფლებები, სიტყვის თავისუფლებას ჩვენ არავის ვუშლით. ჩაატარონ აქცია მშვიდ ვითარებაში, უბრალოდ ნუ გადაკეტავენ პარლამენტის შესასვლელს და ნუ მოახდენენ პარლამენტის პიკეტირებას“, - განაცხადა ვაჟა სირაძემ.

მოძრაობა „სირცხვილიას“ და „შეცვალეს“ მონაწილეებს პარლამენტის ერთ-ერთი შესასვლელი ბლოკირებული აქვთ. ადგილზე მობილიზებულია პოლიცია. აქტივისტების თქმით, ისინი იქამდე გამართავენ აქციებს, ვიდრე არ ექნებათ გარანტია, რომ არჩევნები პროპორციული წესით ჩატარდება.

მანამდე „პატრიოტთა ალიანსის“ ლიდერმა, ირმა ინაშვილმა პარტიების, მათ შორის „ნაციონალური მოძრაობის“, მხარდამჭერებს მობილიზაციისკენ მოუწოდა, რათა პროპორციულ საარჩევნო სისტემაზე გადასვლის შესახებ პროექტის ჩაგდება გააპროტესტონ. ირმა ინაშვილის თქმით, „ახლა აღარ არის გარჩევის დრო, ესა და ის პარტია, ყველამ უნდა გააერთიანოს ძალები“.

პარლამენტში პროპორციულის ჩაგდებასთან დაკავშირებით Facebook-ლაივის დროს მიხეილ სააკაშვილმაც ილაპარაკა და თქვა, რომ „23 ნოემბერი მოდის და ხალხი უნდა დაირაზმოს“.

პარლამენტმა 2020 წლის საპარლამენტო არჩევნების პროპორციული წესით, ნულოვანი ბარიერის პირობებში, ჩატარებასთან დაკავშირებით მომზადებულ საკონსტიტუციო ცვლილებებს მხარი არ დაუჭირა. 101 დეპუტატი მომხრე, 3 კი წინააღმდეგი იყო. უკვე ცნობილია, ვინ დაუჭირა და არ დაუჭირა მხარი პროპორციულ საარჩევნო სისტემაზე გადასვლას.