„ქართული ოცნების“ ცენტრალურ ოფისთან მომხდარ ინციდენტს შსს გამოიძიებს

„ქართული ოცნების“ ცენტრალურ ოფისთან მომხდარი დაპირისპირების ფაქტზე შინაგან საქმეთა სამინისტრომ გამოძიება დაიწყო. 

გამოძიება „სისხლის სამართლის კოდექსის“ 126-ე მუხლით მიმდინარეობს, რაც ძალადობას გულისხმობს.

საპატრულო პოლიციის დეპარტამენტის უფროსის მოადგილის კახა ბუხრაძის განცხადებით, “ქართული ოცნების“ ოფისთან განვითარებული მოვლენებისას არავინ დაუკავებიათ.

„ქართული ოცნების“ ოფისთან იმყოფებოდა სხვადასხვა აზრის მქონე ორი მხარე. ორივე მხარე საკუთარი აზრის გამოხატვას ცდილობდა. მათ შორის მოხდა კონფლიქტი. პოლიცია ადგილზე იცავს საზოგადოებრივ წესრიგს“, - განაცხადა ბუხრაძემ.

„ქართული ოცნების“ ცენტრალურ ოფისთან გამართული აქციის შემდეგ აქტივისტებმა ტერიტორია უკვე დატოვეს. 

აქციისას „გაბედეს“, „შეცვალეს“ და „სირცხვილიას“ აქტივისტებსა და „ქართული ოცნების“ ახალგაზრდული ორგანიზაციის წევრებს შორის დაპირისპირება იყო.  „სირცხვილიას“ წევრების ინფორმაციით, დაშავებულია აქციის 5 მონაწილე. 

გავრცელებული ინფორმაციით, ერთ-ერთმა ახალგაზრდამ „გაბედეს“ წევრს სიტყვიერი შეურაცხყოფა მიაყენა, რასაც შეხლა-შემოხლა და ხმაური მოჰყვა.  

„სირცხვილიას“ წევრმა თათია წულაძემ განაცხადა, რომ „ქართული ოცნების“ ახალგაზრდული ფრთის წარმომადგენელმა მათი მიმართულებით პიროტექტნიკა ისროლა, რის შედეგად მათი მოძრაობის წევრი, გეგა სალუქვაძე დაშავდა. 

აქტივისტებმა მმართველი პარტიის ოფისის წინ მდებარე ღობესა და ასფალტზე წარწერები: „ზონდერი“ და „ქურდული ოცნება“ დატოვეს. 

აქტივისტები დღეს მცხეთაში განვითარებულ მოვლენებს აპროტესტებდნენ. 

მცხეთაში, მაჟორიტარ დიმიტრი ხუნდაძის ოფისთან, ფიზიკური დაპირისპირების დროს შინაგან საქმეთა სამინისტრომ 7 ადამიანი დააკავა, მათ შორის ოთხი, მოძრაობა „გაბედეს“ აქტივისტია. დაკავებულთა შორის არის შალვა ნათელშვილის შვილიც. 

დიმიტრი ხუნდაძე ერთ-ერთია იმ მაჟორიტარ დეპუტატებს შორის, რომელმაც პროპორციულ არჩევნებზე გადასვლას მხარი არ დაუჭირა. პროპორციულის ჩაგდებას თბილისსა და სხვა ქალაქებში საპროტესტო აქციები მოჰყვა.