კონტრტერორისტული ცენტრის უფროსი: კითხვაზე თუ როგორ შემოვიდა ჩატაევი პასუხი გაცემულია

სახელმწიფო უსაფრთხოების სამსახურის კონტრტერორისტული ცენტრის უფროსის ირაკლი ჩიმაკაძის განცხადებით, შეკითხვაზე თუ როგორ შემოვიდა საქართველოს აჰმედ ჩატაევი პასუხი გაცემულია. ამის შესახებ მან გადაცემა „არენას“ პირდაპირ ეთერში განაცხადა.

ირაკლი ჩიმაკაძის თქმით, აჰმედ ჩატაევს საქართველოში შემოსვლაში რამდენიმე ჯგუფი ეხმარებოდა - როგორც თურქეთში, ასევე საქართველოში. მისი განცხადებით, ჩატაევი თურქეთის ტერიტორიიდან საქართველოს მიმართულებით თითქმის ოთხი დღის განმავლობაში მიდიოდა და მან საქართველოს ტერტორიაზე შემოსასვლელად მწვანე ზოლი გამოიყენა. 

ირაკლი ჩიმაკაძის განცხადებით, სპეცოპერაციის ფარგლებში მოპოვებული მასალის დამუშავების მხრივ, მაგალითად თემირლან მაჩალიკაშვილის სახლიდან ამოღებული მობილური ტელეფონიდან მონაცემების მოპოვებაში, საქართველოს სახელმწიფო უსაფრთხოების სამსახურს ამერიკის შეერთებული შტატების შესაბამისი საგამოძიებო სამსახურები დაეხმარნენ.

„ჩვენ წინასწარ ინფორმაცია იმაზე, რომ ჩატაევი საქართველოში იმყოფებოდა, არ გვქონდა... მაგრამ სხვადასხვა ქვეყნის სპეცსამსახურებთან, მათ შორის აშშ-სთან თანამშრომლობით გვქონდა ინფორმაცია ჩატაევის დაჯგუფებების შესახებ“, - თქვა კონტრტერორისტული ცენტრის უფროსმა ირაკლი ჩიმაკაძემ.

მისი განცხადებით, საქმის ფარგლებში მოპოვებული მასალის დიდი ნაწილი სამხარაულისა და შსს-ს საექსპერტო ბიურომ ამოიღო და დაამუშავა, თუმცა პროცესში ქართულ მხარეს ამერიკელებიც ეხმარბეოდნენ. 

მან აბსურდული უწოდა ოპოზიციის წარმომადგენელთა ნაწილისა და სხვა პირთა ბრალდებებს იმის თაობაზე, თითქოს პანკისში ჩატარებული სპეცოპერაციის დროს, შესაბამისს ჯგუფს სახლი შეეშალა და არასწორად შევიდნენ თემირლან მაჩალიკაშვილთან. 

კონტრტერორისტული ცენტრის უფროსი ირაკლი ჩიმაკაძე აცხადებს, რომ სპეცოპერაცია წინასწარ დაიგეგმა და დადგინდა ტერიტორია, ჩატარდა თათბირი და კონკრეტული დავალებები მიეცათ სპეცოპერაციაში მონაწილე ჯგუფის წევრებს. 

დღეს მალხაზ მაჩალიკაშვილმა განაცხადა, რომ პანკისის ხეობაში ჩატარებული სპეცოპერაციის შემდეგ მას ჩხრეკის ოქმზე ხელი არ მოუწერია. 

დღეს ცნობილი გახდა, რომ თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.