ტერორიზმში ბრალდებულმა რამაზ მარგოშვილმა დუმილი დაარღვია

ტერორიზმის საქმეზე დაკავებულმა რამაზ მარგოშვილმა დღეს სასამართლოში დუმილი დაარღვია და პირველი ჩვენება მისცა. როგორ მარგოშვილის ადვოკატმა ინგა ბოლოთაურმა თქვა, მარგოშვილის მიერ დასახელებული ერთ-ერთი პირი ტერორიზმის მხარდაჭერის საქმეზე ბრალდებულია, თუმცა აღკვეთის ღონისძიების სახით არასაპატიმრო ღონისძიება აქვს შეფარდებული. ინგა ბოლოთაურმა დასძინა, რომ ამ პირს რამაზ მარგოშვილის წინააღმდეგ აქვს მიცემული ჩვენება სასამართლოში მოწმის სახით დაკითხვისას. ინფორმაციას 1tv ავრცელებს.

ადვოკატი მიიჩნევს, რომ რამაზ მარგოშვილის მიერ ჩვენებით მიცემული ინფორმაციის საფუძველზე ახალი გამოძიება უნდა დაიწყოს. 

„რამაზ მარგოშვილის ჩვენებაში გამოკვეთილი იყო ძალიან მნიშვნელოვანი გარემოებები, რომლებიც სასამართლოსთვის ცნობილი არ იყო და საქმეში აღნიშნულთან დაკავშირებით ინფორმაცია გამოკვლეული არ იყო. ვფიქრობ, რომ ის ინფორმაცია, რაც გამოძიებას მისცა მარგოშვილმა, ახალი გამოძიების დაწყების საფუძველია. ჩვენ ასევე მივმართავთ საქართველოს პარლამენტს, შეიქმნას საგაოძიებო კომისია აღნიშნულ საქმესთან დაკავშირებით. გამოიკვეთა კონკრეტული პირები, რომლებსაც კავშირები ჰქონდათ აჰმედ ჩატაევთან. ეს ადამიანი არის ბრალდებული, თუმცა აღკვეთად აქვს არასაპატიმრო ეონისძიება შედარდებული“, – განაცხადა ინგა ბოლოთაურმა.

ივნისში ცნობილი გახდა თემირლან მაჩალიკაშვილის მობილური ტელეფონის ექსპერტიზის შედეგები, რომელიც აშშ-ში გაკეთდა. მათ შორის ერთ-ერთი დოკუმენტი, სატელეფონო ამონაწერია. ამონაწერიდან ირკვევა, რომ აჰმედ ჩატაევმა საქართველოს საზღვრის უკანონოდ გადმოკვეთისთანავე, თემირლან მაჩალიკაშვილს დაურეკა. მასალიდან ასევე ირკვევა, რომ მაჩალიკაშვილსა და მარგოშვილს შორის სატელეფონო საუბარი შედგა. თავდაპირველად ამ ჩანაწერის შესახებ რამაზ მარგოშვილმა თქვა, რომ ეს მისი ხმა არ იყო, თუმცა ორი დღის შემდეგ პოზიცია შეცვალა და განაცხადა, რომ აუდიოამასალაში ნამდვილად მისი ხმაა. 

ასევე დადგინდა აჰმედ ჩატაევისა და თემირლან მაჩალიკაშვილის ნათესაური კავშირები.

ბერი გაბრიელ სალოსი ქუჩაზე ანტიტერორისტული სპეცოპერაცია 2017 წლის 21-22 იანვარს ჩატარდა. შედეგად დააკავეს ერთი ადამიანი -  შუაიფ ბორზიევია, ხოლო წინააღმდეგობის გაწევისას გარდაიცვალა სამი ადამიანი, მათ შორის ერთ-ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელწმიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც  ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად.