ლაშა თორდია: სამი სამართალდამცავი უწყება ჩემ წინააღმდეგ არის მობილიზებული

დარწმუნებული ვარ, გამოძიება ბოლოში რაღაც განცხადებას გააკეთებს, რომელიც ჩემ საწინააღმდეგოდ იქნება მიმართული, თითქოს მართლა მე თვითონ მივიყენე დაზიანებები, - ასე გამოეხმაურა სახელმწიფო აუდიტის სამსახურის უფროსი ლაშა თორდია ყოფილი მთავარი პროკურორის, ოთარ ფარცხალაძის ადვოკატების განცხადებას, რომ ისინი არ გამორიცხავენ, ლაშა თორდიას დაზიანებები თავად მიეყენებინა. მის განცხადებას ipn აქვეყნებს.

ლაშა თორდია ადვოკატების პოზიციას აბსურდულს უწოდებს და ამბობს, რომ მის წინააღმდეგ სამართალდამცავი უწყებები ერთობლივად მუშაობენ.

”აქ მხოლოდ ერთადერთი შეფასება შეიძლება გაკეთდეს - ეს ადამიანები არ არიან საღ გონებაზე. ადვოკატები, რომლებიც იცავენ ყოფილ მთავარ პროკურორს, ასეთი მძიმე ბრალდებით, და აცხადებენ, რომ თურმე თვითდაზიანება მივიყენე, ნიშნავს, რომ ეს ადამიანები საღ გონებაზე არ არიან.

პოლიცია და მთავარი პროკურატურა მობილიზებულია ოთარ ფარცხალაძის სახლში. მიშა ჩოხელი, რომელმაც მე დამარტყა ხელი და ახლა აღარსად ჩანს, არის ფინანსური პოლიციის მაღალი თანამდებობის პირი. მთელი ეს სამი სამართალდამცავი ორგანო - ფინანსური პოლიცია, შსს და პროკურატურა ჩემს წინააღმდეგ არიან მობილიზებული, რათა ეს ჩვენებები, რომელსაც მხოლოდ მე ვაძლევ, შემოატრიალონ ჩემ საწინააღმდეგოდ. დარწმუნებული ვარ, ისინი იღებენ ჩემგან ჩვენებებს და შემდგომ ბოლოში რაღაც განცხადებას გააკეთებენ, რომელიც ჩემ საწინააღმდეგოდ იქნება მიმართული, რომ თურმე მე თვითონ მივიყენე დაზიანებები”, - განაცხადა ლაშა თორდიამ. 

ოთარ ფარცხალაძის ადვოკატებმა დღეს გამართულ ბრიფინგზე აღნიშნეს, რომ სახელმწიფო აუდიტის სამსახურის უფროსის განცხადებები ყოფილი მთავარი პროკურორის მიერ მასზე თავდასხმის შესახებ სიცრუეა.  

სახელმწიფო აუდიტის სამსახურის ხელმძღვანელი აცხადებს, რომ თბილისში, შარდენის ქუჩაზე მდებარე ღამის კლუბ „ელ ცენტროში“, ყოფილი მთავარი პროკურორი ოთარ ფარცხალაძე და მისი თანმხლები რამდენიმე პირი თავს დაესხნენ. ლაშა თორდია მომხდარს მის მიერ სამსახურებრივი მოვალეობის შესრულებას უკავშირებს.

ლაშა თორდიაზე თავდასხმის ფაქტზე შსს-მ გამოძიება სისხლის სამართლის კოდექსის 126-ე მუხლით (ძალადობა) დაიწყო.