პროკურატურა: ოთარ ფარცხალაძეს ბრალი ლაშა თორდიას ცემის ფაქტზე წარედგინა

საქართველოს პროკურატურაში აცხადებენ, რომ ყოფილ მთავარ პროკურორს ოთარ ფარცხალაძეს ბრალი ყოფილი გენერალური აუდიტორის, ლაშა თორდიას ცემის ფაქტზე წარუდგინეს. 

„საქმე შეეხება 2017 წლის 13 მაისს ღამის კლუბ „ელ-ცენტროში“ მომხდარ ინცინდენტს, რა დროსაც ოთარ ფარცხალაძემ და მიხეილ ჩოხელმა სცემეს ლაშა თორდიას“, - განაცხადა პროკურორმა ემზარ გაგნიძემ.

მისი თქმით, ოთარ ფარცხალაძისა და მიხეილ ჩოხელის მიერ განხორციელებული ქმედება განეკუთვნება დანაშაულის ნაკლებად მძიმე კატეგორიას, რის გამოც მათ აღკვეთის ღონისძიების სახით გირაო შეეფარდათ.

მისივე ინფორმაციით, ამ საქმეზე წინასასამართლო სხდომა 2018 წლის 20 დეკემბერს ჩაინიშნა.

პროკურატურაში ასევე აცხადებენ, რომ ფარცხალაძე „ომეგა ჯგუფის“ საქმეზეც გამოიკითხება.

„გვსურს საზოგადოებას ვაცნობოთ, რომ „ომეგა ჯგუფის“ საქმესთან დაკავშრებით ჩატარდება ყველა ის საგამოძიებო მოქმედება, რომელიც უწყვეტ რეჟიმში ახლაც მიმდინარეობს. საგამოძიებო მოქმედებების სპეციფიკიდან გამომდინარე, გამომძიებელი თავად საზღვრავს ტაქტიკას, რა რის შემდეგ უნდა განხორციელდეს. ამ ეტაპისთვის ფარცხალაძე „ომეგა ჯგუფის“ საქმეზე არ არის გამოკითხული, თუმცა ვადასტურებ, რომ გამოძიებისთვის არ არსებობენ ხელშეუხებელი პირები. ყველა ის პირი გამოიკითხება და ყველა საჭირო მტკიცებულება იქნება მოპოვებული, რომელიც საქმის გახსნას შეუწყობს ხელს,“ - განაცხადა ემზარ გაგნიძემ.

დღეს ცნობილი გახდა, რომ ოთარ ფარცხალაძეს გირაო შეეფარდა. პარალელურად ლაშა თორდიას ადვოკატებმა ყოფილი მთავარი პროკურორისთვის წარდგენილი ბრალდების გადაკვალიფიცირება მოითხოვეს.

ოთარ ფარცხალაძე ქვეყნის მთავარ პროკურორად 2013 წლის 7 ნოემბერს დაინიშნა და იმავე წლის 30 დეკემბერს გადადგა. ის მთავარ პროკურატურას მხოლოდ 37 დღის განმავლობაში მართავდა და არც მანამდე და არც მერე პრესასთან საჯარო კომუნიკაციის ინტერესი არ გამოუჩენია.

ფარცხალაძის გვარი დაკავშირებულია შს ყოფილი მინისტრის ივანე მერაბიშვილის საკნიდან შესაძლო გაყვანასთან, აუდიტის სამსახურის ყოფილ უფროსთან ლაშა თორდიასთან ფიზიკურ დაპირისპირებასთან და „ომეგა“ ჯგუფის საქმეში სპორტის ყოფილ მინისტრთან ასევე შესაძლო ფიზიკურ დაპირისპირებასთან.