ნინო ქადაგიძე: ბედნიერი ვარ, თუ ჩემი მოსამართლეობის 20 წლის განმავლობაში საზოგადოებამ ვერ ნახა სხვა გადაწყვეტილება, რომელიც სალაპარაკო გახდებოდა

ცალსახად მინდა მოიხსნას კითხვები არჩევნებთან დაკავშირებით, რომელიც მე გავაუქმე, - ამის შესახებ უზენაესი სასამართლოს თავმჯდომარეობის კანდიდატმა, ნინო ქადაგიძემ იურიდიული კომიტეტის სხდომაზე განაცხადა.

„ეს იყო აბსოლუტურად სწორი სამართლებრივი გადაწყვეტილება და ამ გადმოსახედიდანაც კი ყველა ეტაპზე მე ვაგებ იმ გადაწყვეტილებაზე პასუხს და იგივე გადაწყვეტილებას მივიღებდი. იქ არ არსებობდა არც თეორიული, არც სამართლებრივი შანსი მიღებული ყოფილიყო სხვაგვარი გადაწყვეტილება. არჩევნები იყო ტოტალური გაყალბების საფუძველზე ჩატარებული და არ იძლეოდა გადათვლის საშუალებასაც კი. რადგან ყველა ბიულეტენები იყო გახსნილი და ერთ ოთახში თავმოყრილი მთელი ქვეყნის მასშტაბით. ის პერიოდი ძალიან კარგად მახსოვს და ძალიან კარგად მახოვს ის პროცედურაც, რომელიც მე მაშინ განვახორციელე. მე ძალიან ბედნიერი ვარ, რომ თუ ჩემი მოსამართლეობის 20 წლის განმავლობაში საზოგადოებამ ვერ ნახა სხვა გადაწყვეტილება, რომელიც სალაპარაკო გახდებოდა“, - განაცხადა ქადაგიძემ.

უზენაესი სასამართლოს თავმჯდომარეობის კანდიდატის საკითხის განხილვა იურიდიულ საკითხთა კომიტეტს დაევალა. ნინო ქადაგიძე საკანონმდებლო ორგანოში დღეს წარდგა.

უზენაესი სასამართლოს თავმჯდომარეობის კანდიდატად იუსტიის უმაღლესმა საბჭომ 12 ხმით ნინო ქადაგიძე 12 მარტს დაამტკიცა. ნინო გვენეტაძემ თანამდებობა უზენაესი საბჭოს თავმჯდომარის პოსტი 2018 წლის აგვისტოში დატოვა. გადაწყვეტილების მიზეზად მან ჯანმრთლეობის მდგომარეობა დაასახელა.