ირაკლი ჩილინგარაშვილი: ჭაკუა ამბობდა, რომ პოლიტიკურად დევნიდნენ, თუმცა გერმანულმა სასამართლომ ეს არგუმენტები არ გაიზიარა

დავით ჭაკუა ამბობდა, რომ პოლიტიკურად დევნიდნენ და მისი უფლებების დარღვევის რეალური რისკი არსებობდა, თუმცა გერმანულმა სასამართლომ არ გაიზიარა ეს არგუმენტები და თავის გადაწყვეტილებაში აღნიშნა, რომ საქართველოს მართლმსაჯულება სრულად შეესაბამება საერთაშორისო სტანდარტებს, - ამის შესახებ გენერალური პროკურატურის საერთაშორისო ურთიერთობების და სამართლებრივი უზრუნველყოფის დეპარტამენტის ხელმძღვანელმა ირაკლი ჩილინგარაშვილმა განაცხადა.

„დავით ჭაკუა სადავოდ ხდიდა ამ ყველაფერს და ამბობდა, რომ პოლიტიკურად დევნიდნენ და მისი უფლებების დარღვევის რეალური რისკი არსებობდა. თუმცა გერმანულმა სასამართლომ არ გაიზიარა ეს არგუმენტები და თავის გადაწყვეტილებაში აღნიშნა, რომ საქართველოს მართლმსაჯულება სრულად შეესაბამება საერთაშორისო სტანდარტებს, არსებობს კანონის უზენაესობა და, შესაბამისად, ჭაკუას არგუმენტები მოკლებულია ყველანაირ საფუძველს. ექსტრადიცია ხანგრძლივი პროცესია. ხანდახან ეს პროცესი წლების განმავლობაში გრძელდება და დამოკიდებულია ბევრ ფაქტორზე, მათ შორის იმაზე, დავობს თუ არა ადამიანი, შესაბამის სასამართლო ინსტანციებზე, გასაჩივრების პროცედურებზე და ა.შ. ამ შემთხვევაში ის 2019 წლის დეკემბერში დაიწყო და გონივრულ ვადებში დასრულდა“, - განაცხადა ჩილინგარაშვილმა.

ძებნილი დავით ჭაკუა გერმანიიდან საქართველოში ჩამოიყვანეს. დავით ჭაკუას დაუსწრებლად მისჯილი აქვს 3 წლისა და 9 თვის ვადით თავისუფლების აღკვეთა, ჯარიმა და ასევე ჩამორთმეული აქვს სახელმწიფო სამსახურში დანიშვნითი თანამდებობის დაკავების უფლება.