გიორგი შაქარაშვილის გარდაცვალების გარემოებების დასადგენად, სამედიცინო ექსპერტიზაში დამოუკიდებელი ექსპერტიც ჩაერთვება

გიორგი შაქარაშვილის გარდაცვალების გარემოებებთან დაკავშირებულ სამედიცინო ექსპერტიზაში დამოუკიდებელი ექსპერტი, ალექსანდრე გეჯაძეც ჩაერთვება.

ექსპერტის განცხადებით, შინაგან საქმეთა სამინისტროს საგამოძიებო სამსახურმა მათ მიმართა წერილით და უწყების სურვილია, ტრავმის განვითარების შესაძლო მექანიზმის დადგენაში მათი ცენტრის ექსპერტთა კომისიამაც მიიღოს მონაწილეობა.

„ამ ექსპერტიზაში, ჩვენი მხრიდან, სამედიცინო ექსპერტებთან ერთად, ჩავრთავთ ნევროლოგსაც, რადგან გონების დაკარგვის ეპიზოდებზეა საუბარი, შესაძლებლობაზე, შეეძლო თუ არა გონების დაკარგვა. მაღალი ალბათობით, ამ დღეებში უკვე ჩაერთვება ჩვენი კომისია ექსპერტიზის ეროვნული ბიუროს სპეციალისტებთან ერთად. დავიწყებთ მსჯელობას, მაღალი ალბათობით, გავალთ შემთხვევის ადგილზე, დავათვალიერებთ იმ მიდამოს, სადაც გამოძიება გვეკითხება, შეეძლო თუ არა დაგორებით, ან ხახუნით მიეღო დაზიანებები ამა თუ იმ ლოკაციებში და ამის შემდეგ უკვე დაიდება მთლიანი დასკვნა. მაღალი ალბათობით, მიმაჩნია, რომ ერთ საერთო პოზიციაზე უნდა გავიდეთ. არ არის გამორიცხული გარკვეულ კითხვებთან მიმართებაში ადგილი ჰქონდეს აზრთა სხვადასხვაობას. ამ ექსპერტიზის მიზანი ვერ იქნება, ჩვენ დავდოთ დასკვნა რომ პირობითად, ამ პიროვნებამ შაქარაშვილს ასეთ ვითარებაში მიაყენა დაზიანება, რადგან ეს გამოძიების მსჯელობის საგანია. გამოძიება გვეკითხება ტრავმის განვითარების მექანიზმის რამდენიმე ვერსიას“, – განაცხადა გიორგი გეჯაძემ.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა. პროცესი დახურულ რეჟიმში მიმდინარეობდა, რადგან საქმეში ექვსი ბრალდებული არასრულწლოვანია.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.