გიორგი შაქარაშვილის საქმეზე ბრალდებული მორაგბის ადვოკატები დღეს მცხეთაში დამოუკიდებელ საგამოძიებო მოქმედებებსა და ექსპერიმენტებს ჩაატარებენ

გიორგი შაქარაშვილის საქმეზე ბრალდებული მორაგბის, არჩილ გაგნიძის ადვოკატები მცხეთაში დამოუკიდებელი საგამოძიებო მოქმედებებისა და ექსპერიმენტების ჩატარებას დღეს ღამით გეგმავენ.

არჩილ გაგნიძის ერთ-ერთი უფლებადამცველის, ალექსანდრე კობაიძის განცხადებით, საგამოძიებო ექსპერიმენტის მიზანია, სასამართლოს აჩვენონ, რომ ბრალდების მხარის წარმოდგენილი ფაქტობრივი გარემოებები, როგორც თავად მიაჩნიათ, რეალობასთან შეუსაბამოა.

მისივე ინფორმაციით, მათთან ერთად საგამოძიებო ექსპერიმენტში რამდენიმე ადამიანი მიიღებს მონაწილეობას, რომლებიც საქმეში არ ფიგურირებენ.

„საგამოძიებო ექსპერიმენტის არსი არის ის, რომ გადამოწმდეს პირის ბრალდების შესახებ დადგენილება, რომელიც პროკურორმა გამოსცა, სადაც ჩემს დაცვის ქვეშ მყოფს და სხვა პირებს დაუმძიმდათ ბრალი. მაგალითად, გადამოწმდება დროში რამდენად რელევანტურია ის მოსაზრება და ვერსია, რომელიც ბრალდების მხარემ შემოგვთავაზა, რომ 10 წუთში ჯერ ჩავიდნენ აღნიშნულ ტერიტორიაზე, შემდეგ ჩავიდნენ ხევში, ხევში მოახდინეს ლიკვიდაცია, შემდეგ ამოვიდნენ აქედან, მივიდნენ ამირხანაშვილთან, ამირხანაშვილი ჩაისვეს მანქანაში და წამოიყვანეს.

ეს დროში რამდენად შესაძლებელია - გადამოწმდება, იმიტომ, რომ რეალურად, ამდენი დრო მათ იქ არ ჰქონიათ და ფიზიკურად წარმოუდგენელია, რასაც ბრალდების მხარე ედავება ჩემს დაცვის ქვეშ მყოფს. ეს ერთი, მეორე, ბატონი ბრეგვაძის ჩვენება გვინდა რომ გადავამოწმოთ, მან ბოლო ჩვენებაში როგორც ჩანს აღნიშნა, რომ ორი პირი გარბოდა და მის მხედველობის არეალში იყვნენ, უნდა გადამოწმდეს რამდენად დამაჯერებელია ეს ინფორმაცია და ჩვენ ამ ყოველივეს ავსახავთ საგამოძიებო ექსპერიმენტის ოქმებით.

მესამე, ჩვენ რამდენიმე პირის მეშვეობით მოვახდენთ იმ რელიეფში, ღამე, უკუნით სიბნელეში სწრაფად გადაადგილებას და გვაინტერესებს, რაიმე ფორმით მოხდება თუ არა ამ ადამიანების სხეულებზე დაზიანება. მოგეხსენებათ, საქმეში დევს სასამართლო სამედიცინო ექსპერტიზის პასუხები, სადაც არც ერთ იმ ხუთ პირს სხეულზე ძალადობის კვალი არ აღენიშნება, საინტერესოა იმ რთულ რელიეფში რამდენად რეალურია, რომ იქ სწრაფად გადაადგილდი და მინიმუმ ხელი არ გაგეკაწრა, ან თავი არ გაგიტყდა, ფეხი არ მოგტყდა და ა.შ.

ამ საკითხში მონაწილეობას მიიღებენ მოწვეული პირები, რომლებსაც არანაირი ინტერესი არ აქვთ ამ საქმესთან დაკავშირებით. ჩვენ ამ ყოველივეს ღამის საათებში დავიწყებთ“, - განაცხადა ალექსანდრე კობაიძემ.

12 აგვისტოს პროკურატურამ გიორგი შაქარაშვილის საქმეზე განცხადება გაავრცელა. მასში აღნიშნული იყო, რომ გამოძიებამ ბრალდებულთა ინტერესების დამცველი ადვოკატები საქმის მასალებისა და მონაცემების გამჟღავნების დაუშვებლობაზე გააფრთხილა. არჩილ გაგნიძის ადვოკატებმა საქმის მასალების ჩაბარებაზე უარი თქვეს და მასალების გაუთქმელობაზე ხელი არ მოაწერეს. 13 აგვისტოს კი, ბრალდებულს სახაზინო წესით ადვოკატი დაუნიშნეს.

საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო.

გენპროკურატურამ შაქარაშვილის საქმეზე 11 ბრალდებულის საქმე ცალკე წარმოებად გამოყო. გიორგი შაქარაშვილის საქმეზე ხუთ დაკავებულს ბრალი დაუმძიმდა.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.