პროკურორი: უტყუარად შეიძლება ითქვას, რომ 1:500 000-იანი რუკის გამოყენება შეუძლებელია საზღვრის ფაქტობრივი გახაზვის დროს

808-ე მუხლის პირველი ნაწილი, რომელიც წარდგენილი აქვთ ბრალდებულებს გულისხმობს, რომ ნებისმიერი ქმედება, მიუხედავად იმისა, მოჰყვება თუ არა მას შედეგი, მიმართულია ჩვენი ქვეყნის ტერიტორიული მთლიანობის დარღვევისაკენ, მიზანმიმართული ქმედება, რომელიც საფრთხის ქვეშ აყენებს ჩვენი ქვეყნის ტერიტორიულ მთლიანობას, არის დასჯადი ქმედება, - საქართველოს ტერიტორიის ნაწილის გადაცემისკენ მიმართულ დანაშაულზე დაწყებულ გამოძიებაზე პროკურორმა ამირან გულუაშვილმა იმედის გადაცემა „ღია ეთერში“ ისაუბრა.

„ამ მუხლის მეორე ნაწილი ითვალისწინებს უკვე კონკრეტულ შედეგს. როდესაც ამ ქმედებას შედეგად მოყვა საქართველოს ტერიტორიის გამოყოფა ან უცხო სახელმწიფოსთვის გადაცემა. მეორე ნაწილი იმდენად მძიმე დანაშაულებრიბვი ქმედებაა, მისთვის უვადოდ თავისუფლების აღკვეთაც კი არის გათვალისწინებული. ბრალდებულებისთვის წარდგენილი ბრალდებაც შეგვიძლია ორ ნაწილად დავყოთ. რა გამოიყენეს ბრალდებულებმა, საზღვრის შეთანხმების დროს კომისიის ფარგლებში და რა დოკუმენტები უნდა გამოეყენებინათ მათ. როგორც დაცვის მხარე საჯარო განცხადებებში აპელირებს, მათ გამოიყენეს 1:500 000-იანი რუკა. უფრო გასაგები რომ იყოს, ეს ნიშნავს, რომ ფურცლის ერთი სანტიმეტრი შეესაბამება რეალური ტერიტორიის 5 კილომეტრს. ერთ-ერთი ბრალდებულის ადვოკატმა, გუშინ ფაქტობრივად დაადასტურა ის გარემოება, რომ 1:500 000-იანი რუკის გამოყენება საზღვრის გახაზვის პროცესში არის სრულიად შეუძლებელი. ერთ კორექტირებას შვიტან მის ნათქვამში. რეალურად, ბრალდებულების მიერ გამოყენებულ იქნა არა 1:500 000-იანი რუკა, არამედ ამ რუკიდან ე.წ. ამონახაზი. ეს რუკაზე არ არის დატანებული არცერთი ადმინისტრაციული წერტილი, არცერთი გეოგრაფიული აღნიშვნა, არცერთი მდინარე, ქალაქი, სოფელი, დაბლობი, სიმაღლეები, მთები. საკოორდინაციო ბადე არის არასწორად შედგენილი და ეს საექსპერტო კვლევით არის დადგენილი. საბოლოო ჯამში, უტყუარად შეიძლება ითქვას, რომ ამ დოკუმენტის გამოყენება შეუძლებელია საზღვრის ფაქტობრივი გახაზვის დროს“, - აღნიშნა პროკურორმა.

საგარეო საქმეთა მინისტრის მოადგილის, ლაშა დარსალიას განცხადებით, საერთაშორისო ექსპერტებმა შეისწავლეს დავით გარეჯთან დაკავშირებით არსებული რუკები და დოკუმენტები და დაასკვნეს, რომ 1:200 000 მასშტაბის რუკა ამყარებს საქართველოს პრეტენზიებს დავით გარეჯის სამონასტრო კომპლექსის სადავო ტერიტორიაზე.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.