ბათუმის მერიის საკუთრების აღიარების კომისიას პროკურატურაში უჩივიან

არასამთავრობო ორგანიზაცია "საერთაშორისო გამჭვირვალობა საქართველო" ბათუმის მერიის საკუთრების აღიარების კომისიას პროკურატურაში უჩივის. ინფორმაციას 1tv.ge ავრცელებს.

საქმე ეხება ბათუმში, მაზნიაშვილის ქუჩაზე მცხოვრები რუსუდან ჭიჭინაძის სარჩელს, რომელიც უზენაესმა სასამართლომ დააკმაყოფილა. მოსარჩელე 10 წელზე მეტია სახლის მიმდებარედ 150 კვადრატული მეტრი მიწის ფართობის საკუთრებაში დაბრუნებას ითხოვს, რომელიც მათი განცხადებით, ოჯახის წინაპარმა ჯერ კიდევ 1879 წელს აუქციონის წესით შეიძინა. სამი ინსტანციის გავლის შემდეგ, ბათუმის მერიას რუსუდან ჭიჭინაძის მფლობელობაში არსებული ნაკვეთის აღიარება დაევალა.

„ეს მიწა ბაბუაჩემის შეძენილია 1879 წელს აუქციონზე. საბჭოთა რეპრესიების დროს მიწა ჩამოგვართვეს და აქ წლების განმავლობაში ბარაკები იდგა. ბარაკების აღების შემდეგ ტერიტორიას ჩვენ ვსარგებლობთ. 2007 წელს, როცა თვითნებურად დაკავებული ფართების საკუთრებაში გადაცემის შესახებ პრეზიდენტის გადაწყვეტილება შევიდა ძალაში, მაშინ მივმართეთ მერიას, თუმცა 10 წელია საკუთრების აღიარების კომისია საკითხის განხილვაზეც უარს ამბობს, ალბათ იმიტომ, რომ ბათუმის ერთ-ერთ ყველაზე ცენტრალურ ნაწილში ვცხოვრობთ“, - ამბობს რუსუდან ჭიჭინაძე.

დავასთან დაკავშირებით „საერთაშორისო გამჭვირვალობა საქართველომ“ პროკურატურას უკვე მიმართა. ორგანიზაციის ცნობით, კომისია სასამართლოს ხელისუფლებას პატივს არ სცემს და არ ასრულებს უზენაესი სასამართლოს გადაწყვეტილებას.

"სამწუხაროა, რომ მოქალაქეს უკვე 10 წელია უწევს სახელმწიფოსთან უშედეგო ბრძოლა. მივმართეთ პროკურატურას და მოვუწოდებთ ასევე, რომ ეს საქმე არ დარჩეს თაროზე. პასუხი მოეთხოვოთ პირებს, ვინც არ ასრულებს კანონიერ ძალაში შესულ სასამართლოს გადაწყვეტილებას“, - განაცხადა „საერთაშორისო გამჭვირვალობა საქართველოს“ იურისტმა ანა ბერძენიშვილმა.