გოჩა ლორთქიფანიძე: 2008 წლის ომის საქმეზე სტრასბურგის სასამართლოში 700-მდე მტკიცებულება გვაქვს წარდგენილი

სტრასბურგის სასამართლოსა და საერთაშორისო სისხლის სამართლის სასამართლოში გვაქვს მტკიცებულებათა ერთნაირი ბაზა, ეს არის ძირითადად 700-მდე მტკიცებულება, რაც სტრასბურგში წარვადგინეთ და ეს არის ძალიან ტიტანური შრომა, - ამის შესახებ იუსტიციის მინისტრმა გოჩა ლორთქიფანიძემ „იმედის“ გადაცემა „ნამდვილ რიცხვებში“ 2008 წლის ომის საქმეზე საუბრისას განაცხადა.

მისი თქმით, რადგან ცხინვალის რეგიონი არის საქართველოს ნაწილი, სასამართლოს იურისდიქცია, მიუხედავად იმისა, რუსეთი მხარე იქნება თუ არა, ვრცელდება იმ დანაშაულებზე, რაც ჩადენილია რომის სტატუტის მხარეს სახელმწიფოს ტერიტორიზე, ამ შემთხვევაში ეს არის საქართველოს ტერიტორია და შესაბამისად, ნებისმიერი ადამიანი და რუსეთის მოქალაქეები ექცევიან ზუსტად საერთაშორისო სისხლის სამართლის სასამართლოს იურისდიქციის ქვეშ.

„ვითარებას ართულებს ის, რომ რუსეთის ფედერაციამ ხელმოწერა გაიწვია და არ თანამშრომლობს საერთაშორისო სისხლის სამართლის სასამართლოსთან და განსაკუთრებით, პროკურორის ოფისთან. თუმცა, როგორც ფატუ ბენსუდა​მ განაცხადა, ეს ვითარებას ართულებს, თუმცა ეს არ ნიშნავს, რომ საქმის გამოძიება შეუძლებელია. გამომდინარე ამ გარემოებებიდან, ჩვენ მაქსიმალურად ვთანამშრომლობთ. სტრასბურგის სასამართლოსა და საერთაშორისო სისხლის სამართლის სასამართლოში გვაქვს მტკიცებულებათა ერთნაირი ბაზა, ეს არის ძირითადად 700-ამდე მტკიცებულება, რაც ჩვენ სტრასბურგში წარვადგინეთ და ეს არის ძალიან ტიტანური შრომა. ეს მტიკიცებულება არის ფოტო, აუდიო და ვიდეომასალა, ეს არის ისეთი უნიკალური მტიკიცებულება, როგორიცაა სეისმური სადგურის ჩანაწერები“, - განაცხადა გოჩა ლორთქიფანიძემ.

2008 წლის ომის საქმეზე სტრასბურგის სასამართლო გადაწყვეტილებას 2021 წლის 21 იანვარს გამოაცხადებს. აღნიშნულ საქმეზე საქართველო რუსეთს ადანაშაულებს ევროპული კონვენციის 8 მუხლის დარღვევაში.

ევროპული სასამართლოს დიდი პალატის წინაშე ბოლო ზეპირი მოსმენა 2018 წლის 23 მაისს გაიმართა, რომლის ფარგლებშიც საქართველოს იუსტიციის სამინისტრო, ასევე მყარი პოზიციებითა და მტკიცებულებებით წარსდგა.