გოჩა ლორთქიფანიძე სტრასბურგის სასამართლოზე: მოლოდინი არის სასიკეთო, უნდა იყოს ისეთი გადაწყვეტილება, რომელსაც ეს ქვეყანა იმსახურებს

2008 წლის ომის საქმეზე სტრასბურგის სასამართლო გადაწყვეტილებას მომავალი წლის 21 იანვარს გამოაცხადებს, - ამის შესახებ იუსტიციის მინისტრმა გოჩა ლორთქიფანიძემ „იმედის“ გადაცემა „ნამდვილ რიცხვებში“ განაცხადა.

მას კითხვით მიმართეს, რას უნდა ელოდოს საქართველო სტრასბურგის სასამართლოს გადაწყვეტილებით.

გოჩა ლორთქიფანიძის თქმით, ეს არის ბრძოლა სამართლისა და სამართლიანობისთვის.

„ჩვენი სამართალი, სამართლე განმტკიცებულია სწორედ მტკიცებულებებით. აქედან გამომდინარე, მოლოდინი არის სასიკეთო. უნდა იყოს ისეთი გადაწყვეტილება, რომელსაც ეს ქვეყანა ელოდება და რომელსაც იმსახურებს.

ჩვენ მივმართავთ არა სამხედრო, არამედ სამართლებრიც საშუალებას ჩვენი სიმართლის სამტკიცებლად. ეს არის იურიდიული დავა და ზუსტად ეს იუსტიციის კომპონენტია ის ჯგუფი, გუნდი, რომელიც ამ ხალხის სახელით იცავს ქვეყნის სუვერენიტეტს. ამ ქვეყნის ინტერესებსა და იმას, რომ სამართლიანობა აღდგეს ამ ქვეყნისა და მისი მოსახლეობისთვის“, - განაცხადა ლორთქიფანიძემ.

აღნიშნულ საქმეზე საქართველო რუსეთს ადანაშაულებს ევროპული კონვენციის 8 მუხლის დარღვევაში, კერძოდ, საქართველო მიიჩნევს, რომ რუსეთმა ომისა და შემდგომი ოკუპაციის დროს დაარღვია ევროპული კონვენციის შემდეგი მუხლები: სიცოცხლის უფლება (მე-2 მუხლი); წამების, არაადამიანური ან ღირსების შემლახველი მოპყრობის ან დასჯის აკრძალვა (მე-3 მუხლი); თავისუფლებისა და უსაფრთხოების უფლება (მე-5 მუხლი); პირადი და ოჯახური ცხოვრების დაცულობის უფლება (მე-8 მუხლი); სამართლებრივი დაცვის ქმედითი საშუალების უფლება (მე-13 მუხლი); საკუთრების დაცვა (1-ლი დამატებითი ოქმის 1-ლი მუხლი); განათლების უფლება (1-ლი დამატებითი ოქმის მე-2 მუხლი); მიმოსვლის თავისუფლება (მე-4 დამატებითი ოქმის მე-2 მუხლი).

ევროპული სასამართლოს დიდი პალატის წინაშე ბოლო ზეპირი მოსმენა 2018 წლის 23 მაისს გაიმართა, რომლის ფარგლებშიც საქართველოს იუსტიციის სამინისტრო, ასევე მყარი პოზიციებითა და მტკიცებულებებით წარსდგა.