უფლებადამცველი: ოჯახის ძალადობის მსხვერპლზე პოლიცია ახდენს ზეწოლას

კავშირ „საფარის“ ხელმძღვანელი, უფლებადამცველი ბაია პატარაია ამბობს, რომ ქალზე, რომელიც ძალადობის მსხვერპლი გახდა და ქმარს უჩივლა, ზეგავლენას ახდენენ როგორც ნათესავები, ასევე პოლიციელებიც. ინფორმაციას netgazeti.ge ავრცელებს.

ბაია პატარაიამ 27 ივნისს, facebook-ზე დაწერა ძალადობის მსხვერპლი ქალის შესახებ, ვინც ქმარმა გონებისდაკარგვამდე სცემა, სექსუალურად იძალადა და მოკვლით დაემუქრა. მისივე განცხადებით, „საფარისთვის“ მიმართვის შემდეგ, დღის განმავლობაში, დაუკავშირდნენ არაერთ სახელმწიფო უწყებას, თუმცა, მათი რეაგირება არაქმედითი იყო.

საბოლოოდ, 27 ივნისს ღამით პოლიციამ სავარაუდო მოძალადე დააკავა, თუმცა, პატარაიას თქმით, ძალადობის მსხვერპლზე როგორც ქმრის ოჯახის ნათესავები, ასევე პოლიციელები ახდენენ ზეგავლენას და შესაძლოა, მსხვერპლმა ჩვენება მოძალადე ქმრის სასარგებლოდ შეცვალოს.

შსს-ს განცხადებით, საგამოძიებო მოქმედებები ინფორმაციის მიღებისთანავე დაიწყო და ასევე, არ შეესაბამება სინამდვილეს ინფორმაცია იმის შესახებ, რომ პოლიციელებმა მსხვერპლს ინფორმაციის გასაჯარეობის გამო უსაყვედურეს.

უფლებადამცველი ამბობს, რომ  ხშირად, ქალზე ასეთი ზეწოლა იწვევს იმას, რომ საქმე საერთოდ წყდება, ან გამამართლებელი განაჩენი დგება.