ომბუდსმენი: მუხტარლის საქმეზე პროკურატურამ ჩვენი წინადადება ნაწილობრივ გაითვალისწინა

​საქართველოს მთავარმა პროკურატურამ ნაწილობრივ გაიზიარა საქართველოს სახალხო დამცველის წინადადება აზერბაიჯანელი ჟურნალისტის აფგან მუხტარლის დაზარალებულად ცნობისა და მის მიმართ პოლიციის თანამშრომლების მიერ განხორციელებული შესაძლო დანაშაულის ფაქტზე მიმდინარე სისხლის სამართლის საქმის პროკურატურის გამომძიებლებისთვის გადაცემის თაობაზე. ამის შესახებ ინფორმაციას ომბუდსმენის ოფისი ავრცელებს.

„საქართველოს სახალხო დამცველმა მიიჩნია, რომ აფგან მუხტარლის მიმართ საქართველოს შინაგან საქმეთა სამინისტროს თანამშრომლების მიერ ჩადენილი შესაძლო დანაშაულის ფაქტზე გამოძიების წარმოება იმავე სამინისტროს მიერ, ვერ უზრუნველყოფდა ეფექტიანი გამოძიებისთვის საჭირო დამოუკიდებლობის ხარისხს და 2017 წლის 3 ივლისს საქართველოს მთავარ პროკურორს მიმდინარე სისხლის სამართლის საქმის პროკურატურის  გამომძიებლებისთვის გადაცემის წინადადებით მიმართა. ამასთან, სახალხო დამცველის რეკომენდაციით, პროცესუალური უფლებებით სარგებლობის უზრუნველსაყოფად, აფგან მუხთარლის უნდა მინიჭებოდა დაზარალებულის სტატუსი.

2017 წლის 21 ივლისის სახალხო დამცველს საქართველოს მთავარი პროკურატურიდან წერილობით აცნობეს, რომ მუხტარლის საქმე გამოსაძიებლად საქართველოს მთავარი პროკურატურის საგამოძიებო ნაწილს გადაეცა.“- ნათქვამია სახალხო დამცველის განცხადებაში.

რაც შეეხება ჟურნალისტის დაზარალებულად ცნობის საკითხს, მთავარი პროკურატურის განმარტებით, ამგვარი გადაწყვეტილების მიღება მოხდება საქართველოს სისხლის სამართლის საპროცესო კანონმდებლობით გათვალისწინებული საფუძვლების არსებობისას. „სახალხო დამცველი არ იზიარებს აღნიშნულ პოზიციას და მიიჩნევს, რომ სახეზეა მუხთარლისთვის დაზარალებულის სტატუსის მინიჭების წინაპირობები. სახალხო დამცველი აგრძელებს გამოძიების მიმდინარეობაზე ზედამხედველობას და მის ცალკეულ ასპექტებზე საკუთარ შეფასებას საზოგადოებას პერიოდულად მიაწვდის.“- აღნიშნავს ომბუდსმენი. 

აფგან მუხტარლი თბილისიდან 29 მაისს გაუჩინარდა. ის აზერბაიჯანში დააკავეს. მას ბაქოს საქალაქო სასამართლომ წინასწარი სამთვიანი პატიმრობა მიუსაჯა, პროკურატურამ ბრალი კონტრაბანდის, სახელმწიფო საზღვრის უკანონო გადაკვეთის და პოლიციისთვის დაუმორჩილებლობის მუხლებით წარუდგინა.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.

ქართულმა გამოძიებამ აზერბაიჯანულ გამოძიებას აფგან მუხტარლის დაკითხვის თხოვნით მიმართა. სასაზღვრო პოლიციის უფროსმა და სუს-ის კონტრდაზვერვის უფროსმა თანამდებობები დატოვეს. ცნობილი გახდა, რომ მუხტარლის საქმეს საქართველოს მთავარი პროკურატურა გამოიძიებს.

ევროპარლამენტმა აფგან მუხტარლის საქმეზე რეზოლუცია მიიღო.

სტრასბურგის სასამართლომ საქმეს "აფგან მუხტარლი საქართველოსა და აზერბაიჯანის წინააღდმეგ" პრიორიტეტი მიანიჭა. საქმეს დაჩქარებული წესით განიხილავენ.

საპარლამენტო უმცირესობა შინაგან საქმეთა მინისტრთან შეხვედრას და საგამოძიებო კომისიის შექმნას ითხოვს, უმრავლესობა კი, გამოძიების შედეგებს ელოდება.