გვარამია: არ არის გამორიცხული, სააკაშვილს ახალი ბრალი წაუყენონ

რუსთავი 2-ის გენერალური დირექტორის ნიკა გვარამიას დაკითხვა დასრულდა. მან მოდულის შენობა ცოტა ხნის წინა დატოვა. მისი დაკითხვა დაახლოებით 15 წუთი გაგრძელდა.

გვარამიამ ჟურნალისტებს განუცხადა, რომ საპროცესო კანონმდებლობის მოთხოვნა შესრულდა და მას აცნობეს, რომ მიმდინარეობდა მის ტელეფონზე ფარული მიყურადება და ჩაწერა, თუმცა საინტერესო ვერაფერი აღმოაჩინეს. „საქმის მასალები ძალიან დიდია, ამიტომ გაცნობა არც გვიცდია. გავეცანით მხოლოდ იმას, რაც საინტერესო იყო, კერძოდ განჩინებას და გარკვეულ მასალებს,“- განაცხადა გვარამიამ.

რუსთავი 2-ის დირექტორს გამომძიებელმა აუხსნა, რომ გამოძიება მიმდინარეობს, თუმცა რადგან საქმის მთავარი ფიგურანტი არის მიხეილ სააკაშვილი და მის წინააღმდეგ აღძრული საქმეები  ეკონომიკური ხასიათისაა, ამის საფუძველზე მისი ექსტრადაცია შეუძლებელია.

„ არ არის გამორიცხული, მას ბრალი წაუყენონ ისეთი ტიპის საქმისთვის, რომელიც უკრაინის ხელისუფლებას მისი საქართველოში ექსტრადირების შესაძლებლობას მისცემს. ეს ჩემი ვარაუდია, თუმცა საკმაოდ ლოგიკური და დასაბუთებული,“- განაცხადა გვარამიამ.

მან კომენტარი გააკეთა ასევე რუსთავი 2-ში დამონტაჟებულ კამერებთან დაკავშირებით. „რუსთავი 2-ის გარშემო დამონტაჟებულ კამერებზე ჩვენ არაერთხელ მოვითხოვეთ ახსნა-განმარტება, თუმცა პასუხი არ მივიღია. ეს კამერები მარტო გარეთ არ არის დამონტაჟებული, შიგნითაც აღმოვაჩინეთ. რუსთავი 2 არის ხელისუფლების ნომერ პირველი მტერი და მას უთვალთვალებს, სანამ ეს ხელისუფლება იქნება,“- დასძინა ნიკა გვარამიამ.   

ნიკა გვარამიას დაკითხვა სამ საათზე დაიწყო. 

ტელეკომპანია „რუსთავი 2“-ის გენერალურმა დირექტორმა ნიკა გვარამიამ Facebook-ის საკუთარ გვერდზე დაწერა, რომ დაკითხვაზე დაიბარეს. მისი ინფორმაციით, ის დაკითხვაზე სახელმწიფო გადატრიალების საქმეზე 2015 წელს დაწყებული გამოძიების ფარგლებშია დაბარებული.