პროკურორმა პანკისში დაკავებულებისთვის პატიმრობის მოთხოვნის მიზეზი განმარტა

სახელმწიფო ბრალდება მოითხოვდა ოთხი ბრალდებულისთვის პატიმრობის შეფარდებას, რადგან არსებობდა საფრთხე, ბრალდებულების მხრიდან მოწმეებზე მომხდარიყო ზეწოლა დანაშაულებრივი ქმედების გაგრძელებისა და საქართველოს ტერიტორიის დატოვების, - ამის შესახებ პროკურორმა ელიზაბარ გოზალიშვილმა პანკისის სპეცოპერაციისას დაკავებული სამი პირისთვის წინასწარი პატიმრობის შეფარდების თაობაზე გაკეთებული კომენტარისას განაცხადა. ამის შესახებ 1tv წერს.

რაც შეეხება ზურაბ გორნაკაშვილის საქმეს, როგორც პროკურორმა ჟურნალისტებთან საუბრისას განაცხადა, ეს იყო ჩვეულებრივი სტანდარტული პროცედურა, როცა პროკურატურამ ბრალის წარდგენაზე მიმართა სასამართლოს აღკვეთი ღონისძიების შეფარდებაზე შუამდგომლობით, ამის შემდეგ მიმართა სხვა ბრალდებულებზე, რის გამოც პროცესები გაიმართა ცალ-ცალკე.

„რაც შეეხება მაჩალიკაშვილს, ის ამ ეტაპზე დაკავებული არ არის, ის იმყოფება სამედიცინო დაწესებულებაში. დაველოდებით, როგორ განვითარდება ამ მიმართულებით შესაბამისი მოქმედებები. ის არ არის ბრალდებულის სტატუსით დაკავებული და არანაირი 48-საათიანი ვადის დაცვის ვალდებულება არ გვაქვს. სასამართლოს განჩინებით უნდა მომხდარიყო მაჩალიკაშვილის დაკავება, თუმცა განვითარებული მოვლენებიდან გამომდინარე, ვერ მოხდა მისი დაკავება. რაც შეეხება საქმესა და მტკიცებულებებს, აქ არის მოწმეთა ჩვენებები, ამოღებული ნივთიერი მტკიცებულებები, რომლითაც დასტურდება ოთხივე ბრალდებულის კავშირი ტერორისტულ ორგანიზაციასთან, რაც შეეხება მაჩალიკაშვილის საკითხს, ამ ეტაპზე მიმდინარეობს მოცემული საქმიდან დამოუკიდებლად გამოძიება და აღნიშნული ფაქტობრივი გარემოებები დადგინდება ამ საქმის გამოძიების დროს“, – განაცხადა ელიზბარ გოზალიშვილმა.

კითხვაზე იყო თუ არა მაჩალიკაშვილის საცხოვრებელ სახლში ხელყუმბარა პროკურორი განმარტავს, რომ ამ გარემოებებს დამოუკიდებლად წარმოებული გამოძიება დაადგენ.

პანკისში სპეცოპერაციის დროს დაკავებულ კიდევ სამ პირს წინასწარი პატიმრობა შეეფარდა. სასამართლოზე უსაფრთხოების ზომები გაძლიერებული იყო.

პანკისსა და თბილისში ჩატარებული სპეცოპერაციის დროს სუსმა 5 პირი დააკავა, რომლებიც, სავარაუდოდ, აჰმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა. 

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე. 

აჰმედ ჩატაევმა, თბილისში, 22 ნოემბერს ბერი გაბრიელ სალოსის ქუჩაზე, კონტრტერორისტული სპეცოპერაციის დროს, თავი აიფეთქა. ეს ფაქტი, დამნაშავეთა ცხედრების ექსპერტიზის შემდეგ, საქართველოს უსაფრთხოების სამსახურში დაადასტურეს. 

ასევე, ცნობილია ვინ დააკავეს და ვინ მოკლეს გაბრიელ სალოსის ქუჩაზე სპეცოპერაციის დროს.