პროკურორი: სააკაშვილის განაჩენი ექსტრადირებისთვის ახალ გარემოებად ვერ ჩაითვლება

საქართველოში მიხეილ სააკაშვილის ექსტრადირების მიზნით საქართველოს პროკურატურა უკრაინისთვის დამატებით მიმართვას არ გეგმავს. ამის შესახებ პროკურორმა ირაკლი ნადარეიშვილმა თქვა.

საგამოძიებო უწყებაში განმარტავენ, რომ ექსტადირების მოთხოვნა უკრაინაში უკვე გადაგზავნილია და 3 დღის წინ გამოტანილი განაჩენი ამ პროცესთან კავშირში არ არის.

"ეს განაჩენი არ არის ბმაში საექსტრადაციო მოთხოვნასთან. უკრაინულ მხარეს თავის დროზე წარედგინა ყველა დოკუმენტი, რაც მათ მიერ იყო მოთხოვნილი. გადაწყვეტილება უკრაინის მხარემ უნდა მიიღოს და ვერავითარ ახლადგამოვლენილ გარემოებებად ვერ წარმოჩინდება გამამტყუნებელი განაჩენი, რომლითაც შეიცვალა მხოლოდ ერთადერთი სტატუსი - ბრალდებული სააკაშვილი გახდა მსჯავრდებული. საბოლოო პასუხი ექსტრადირებაზე ჩვენ დღემდე არ მოგვსვლია, ველოდებით უკრაინული მხარის გადაწყვეტილებას. ის რაც გასაკეთებელი იყო უკრაინულ მხარესთან უკვე გაკეთებულია, მოლოდინის რეჟიმში ვართ",- განაცხადა ირაკლი ნადარეიშვილმა.

მოსამართლე გიორგი არევაძემ სანდრო გირგვლიანის საქმეზე მიხეილ სააკაშვილი დამნაშავედ ცნო. სასჯელის სახით სასამართლომ სააკაშვილს 4 წლით თავისუფლების აღკვეთა მიუსაჯა. ამნისტიით მას სასჯელი 1/4-ით, 3 წლამდე შეუმცირა.

ეს პირველი განაჩენია, რომელიც საქართველოს ყოფილი პრეზიდენტის მიმართ დადგა. ამას გარდა, სააკაშვილი სისხლის სამართლის კიდევ სამ საქმეშია ბრალდებული:

1. 2007 წლის 07 ნოემბერს, მომიტინგეთა მასობრივად დარბევის, ტელეკომპანია "იმედში" შეჭრისა და არკადი პატარკაციშვილის კუთვნილი ქონების დანაშაულებრივად ხელში ჩაგდების ფაქტზე, საქართველოს სისხლის სამართლის კოდექსის 333-ე მუხლის მესამე ნაწილის ,,ბ“ და ,,გ“ ქვეპუნქტებით და 333-ე მუხლის მეორე ნაწილით, რაც გულისხმობს სახელმწიფო-პოლიტიკური თანამდებობის მქონე პირის მიერ, სამსახურებრივი უფლებამოსილების გადამეტებას, ჩადენილი ძალადობით და დაზარალებულის პირადი ღირსების შეურაცხყოფით (ე.წ. ,,7 ნოემბრისა და ტელეკომპანია ,,იმედის“ დარბევის საქმე)

2. სახელმწიფო-პოლიტიკური თანამდებობის მქონე პირის მიერ, სამსახურებრივი უფლებამოსილების გადამეტებისთვის, ჩადენილი ძალადობით და იარაღის გამოყენებით, რამაც ფიზიკური პირის უფლებისა და სახელმწიფოს კანონიერი ინტერესის არსებითი დარღვევა გამოიწვია; ასევე,  ჯგუფურად ჯანმრთელობის განზრახ მძიმე დაზიანების ორგანიზებისთვის (სხეულის დაზიანება, რომელიც სახიფათოა სიცოცხლისთვის და რომელმაც გამოიწვია სახის წარუშლელი დამახინჯება), საქართველოს სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტითა და  25,117-ე მუხლის მეხუთე ნაწილის „ე“ ქვეპუნქტით  (ვალერი გელაშვილზე თავდასხმის საქმე).

3. წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, დიდი ოდენობით (8 837 461 ლარის) საბიუჯეტო თანხების გაფლანგვისთვის, საქართველოს სისხლის სამართლის კოდექსის 182-ე მუხლის მეორე ნაწილის ,,ა’’ და ,,დ’’ ქვეპუნქტებითა და ამავე მუხლის მე-3 ნაწილის ,,ბ’’ ქვეპუნქტით (სახელმწიფო დაცვის სპეციალური სამსახურის ხარჯების საქმე). 

პროკურატურა საქართველოს ყოფილი პრეზიდენტის უკრაინიდან ექსტრადიციას მოითხოვს.