წარწერაზე „არა ჩადებას“ ქუთაისში შეიძლება მოკვლევა დაიწყოს

აქციის „არა ჩადებას“ ფარგლებში ქუთაისში გაკეთებულ წარწერაზე, შესაძლოა, მოკვლევა დაიწყოს. რუსთაველის 8 ნომერში მდებარე შენობაზე, რომელიც დავით კაკაბაძის სახელობის სახვითი ხელოვნების გალერეაა და კულტურული მემკვიდრეობის ძეგლის სტატუსს ატარებს, წარწერა ბ.თ-მ გუშინ გააკეთა, რომელმაც ქვეყანაში არსებული ნარკოპოლიტიკა გააპროტესტა. ამის შესახებ სააგენტო ipn-ი წერს.

გალერეის დირექტორი ელისო ჩოგოვაძე აცხადებს, რომ ვანდალური ფაქტის შესახებ მიმართავს კულტურულ დაწესებულებათა ა(ა)იპ-ს, რომლის დაქვემდებარებაშიც არის გალერეა.

„გაერთიანების მმართველს ჩავაყენებთ საქმის კურსში. გუშინ ვნახე ეს წარწერა, რა თქმა უნდა, ეს არაა კარგი. სამართლიანობაზე რომ გაქვს პრეტენზია, უკანონო გზებით არ უნდა იბრძოლო სამართლიანობისთვის, სხვადასხვა საშუალებაა აზრის გამოსახატად და შესაძლებელია, ეს დააფიქსირონ კანონიერად. ეს არის ვანდალიზმი, მე პირადად ვემხრობი აქციას „არა ჩადებას“, მაგრამ არა ამ ფორმით”, - განაცხადა ელისო ჩოგოვაძემ.

კულტურული მემკვიდრეობის დაცვის სააგენტოს წარმომადგენელი ბექა ბარამიძე განმარტავს, რომ მათ ამ ფაქტის შესახებ ინფორმაცია არ ჰქონდათ, თუმცა არ გამორიცხავს, უწყებამ თავად დაიწყოს ამ ფაქტის მოკვლევა.

„შესაძლებელია, ჩვენ თავად დავიწყოთ დამოუკიდებლად ამ საქმეზე მუშაობა. ძეგლზე წარწერა ისჯება ფიზიკური პირისთვის 5000 ლარით, იურიდიულისთვის 10 000 ლარით, ჯარიმა დიდია, თუმცა მოქალაქემ უნდა გაიაზროს სამოქალაქო პასუხისმგებლობა “, -განაცხადა ბექა ბარამიძემ.

4 თებერვალს საქართველოს შინაგან საქმეთა სამინისტრო აქციას "არა ჩადებას" შეუერთდა. უწყებამ პოზიცია facebook-ის ოფიციალურ გვერდზე დააფიქსირა. 

მოგვიანებით, შინაგან საქმეთა მინისტრის მოადგილე ნათია მეზვრიშვილმა კამპანიაში "არა ჩადებას" სამინისტროს მონაწილეობაზე კომენტარი გააკეთა და განმარტა, რომ სამინისტრო ცალსახად და ერთმნიშვნელოვნად ემხრობა "არა ჩადებას."