ლაშა თორდია: ფარცხალაძის დანაშაულს თუ არ გამოიძიებენ, საერთაშორისო ორგანიზაციებს მივმართავ

ყოფილ მთავარ აუდიტორს, ლაშა თორდიას იმედი აქვს, რომ ახალი მთავარი პროკურორი დაინტერესდება მისი საქმით. „თუ ოთარ ფარცხალაძის დანაშაულს არ გამოიძიებენ, დახმარებისთვის საერთაშორისო ორგანიზაციებს მივმართავ“, - ამის შესახებ სახელმწიფო აუდიტის სამსახურის ყოფილმა ხელმძღვანელმა ლაშა თორდიამ გაზეთ „კვირის პალიტრასთან“ ინტერვიუში განაცხადა.

თორდიას თქმით, მისი უმთავრესი ამოცანაა, ერთი წლის წინ დაწყებული საქმის გამოძიება ბოლომდე მივიდეს. „ოთარ ფარცხალაძეს ჰქონდა და დარწმუნებული ვარ, დღესაც აქვს პროკურატურაში გავლენა. ახლა უკვე ყოფილი პროკურორი ირაკლი შოთაძე ფარცხალაძის კადრი იყო და სიმართლე გითხრათ, არც მქონდა ილუზია, რომ შოთაძე ყოფილი ხელმძღვანელის დანაშაულებრივ საქმიანობას გამოიძიებდა. საქმე მხოლოდ ლაშა თორდიას არ ეხება. ირაკლი ფარცხალაძემ უმნიშვნელოვანეს ინსტიტუციას - სახელმწიფო აუდიტის სამსახურს მიაყენა შეურაცხყოფა და ფიზიკურად გაუსწორდა მხოლოდ იმის გამო, რომ ჩვენ მაშინ თბილისის მერიის საქმიანობა და ოთარ ფარცხალაძისთვის სახელმწიფო ქონების მესამედ ფასად გადაცემა გამოვიკვლიეთ. პროკურატურა არც ჩვენი გაგზავნილი დოკუმენტებით დაინტერესებულა. აუდიტორების ჯგუფის გამოკვლეულ მასალებში სწორედ სისხლის სამართლის დანაშაული იკვეთებოდა, მაგრამ ეს საქმეც დღემდე თაროზეა შემოდებული“, - განაცხადა ლაშა თორდიამ.

12 მაისს სახელმწიფო აუდიტის სამსახურის ხელმძღვანელ ლაშა თორდიას და ყოფილ მთავარ პროკურორ ოთარ ფარცხალაძეს შორის ინციდენტი მოხდა.

ლაშა თორდიას მტკიცებით, მას თავს ოთარ ფარცხალაძე და მისი თანმხლები რამდენიმე პირი დაესხნენ. სახელმწიფო აუდიტის სამსახურის ხელმძღვანელი მომხდარს მის მიერ სამსახურებრივი მოვალეობის შესრულებას უკავშირებს.

ლაშა თორდია აუდიტის გენერალურ აუდიტორად 2012 წლის 25 ივლისს დაინიშნა, ხოლო გენერალურ აუდიტორად მუშაობის უფლებამოსილების ვადა 2017 წელს ამოეწურა.