პროკურატურა: კობაურის ადვოკატმა საქმის სრული მასალების ასლები თავად არ ჩაიბარა

საქართველოს მთავარი პროკურატურა ხადის ხეობაში სმითების ოჯახის მკვლელობაში ბრალდებულის ადვოკატების განცხადებას ეხმიანება. ადვოკატები ამბობენ, რომ ბრალდების მხარე არ იძლევა სრულად ინფორმაციას მტკიცებულებების შესახებ. ინფორმაციას სააგენტო "ინტერპრესნიუსი" ავრცელებს.

"პროკურატურა არ არის ვალდებული, ერთ კონკრეტულ საქმეზე წარმოდგენილ ყველა ადვოკატს გადასცეს საქმის მასალების ასლები, როდესაც ის მიწოდებულია უკვე დაცვის მხარისთვის", - პასუხობენ ადვოკატებს პროკურატურაში. 

„მას შემდეგ, რაც დავით გირგვლიანი საქმეს ჩამოშორდა, იმავე დღეს, სახაზინო ადვოკატს ალუდა ბუჩუკურს, რომელიც დღემდე იცავს ბრალდებულს, მისივე მოთხოვნის საფუძველზე გადაეცა საქმეში არსებული ყველა მტკიცებულების ასლი და ინფორმაცია. 27 ივლისს საქმეში ჩაერთო კიდევ ორი ადვოკატი – ვასილ მამულაშვილი და ალექსანდრე კობაიძე. მათ ითხოვეს საქმის მასალების გადაცემა. თავდაპირველად, ბრალდების მხარემ ადვოკატ მამულაშვილს მიაწოდა დამატებითი მტკიცებულებები, რაც ბრალდების მხარისათვის და მისი ადვოკატებისთვის მანამდე გადაცემული არ ყოფილა და მასვე განემარტა, რომ დაცვის მხარისათვის სრულად იყო უკვე მიწოდებული ყველა მასალა. მიუხედავად ამისა, ადვოკატმა მამულაშვილმა კვლავ ითხოვა საქმის მასალების ასლების სრულად გადაცემა. პროკურატურა არ არის ვალდებული, ერთ კონკრეტულ საქმეზე წარმოდგენილ ყველა ადვოკატს გადასცეს საქმის მასალების ასლები, როდესაც ის მიწოდებულია უკვე დაცვის მხარისთვის, თუმცა ამის მიუხედავად, ადვოკატ მამულაშვილს მიეცა საშუალება, მისულიყო მცხეთა-მთიანეთის პოლიციის დეპარტამენტში და სრული მასალების ასლები ჩაებარებინა. ის გამოცხადდა დეპარტამენტში, თუმცა უარი განაცხადა დოკუმენტაციის ჩაბარებაზე, შემდგომ კი, მედიასაშუალებებით გაკეთდა მისი და ადვოკატ კობაიძის მხრიდან განცხადება, რომ თითქოს მათ არ აქვთ წვდომა მოპოვებულ მტკიცებულებებზე", – განაცხადეს პროკურატურაში.

სმითების ოჯახის მკვლელობაში ბრალდებული მწყემსი ბრალს ისევ არ აღიარებს და დანაშაულის ჩადენაში ორი უცხო ადამიანის გარდა, სხვების მონაწილეობაზეც საუბრობს. ადვოკატ ალექსანდრე კობაიძის თქმით, საქმეში პროკურატურის მხრიდან არასწორი მიდგომები იკვეთება. მეორე ადვოკატი ვასილ მამულაშვილი საქმეში არსებულ საეჭვო გარემოებებზე საუბრობს. თუმცა, მისი თქმით როდესაც დაცვის მხარეს სრულად გადაეცემა მტკიცებულებები, ფაქტებს მას შემდეგ გააჟღერებს.

21 ივლისს „ქრონიკისთვის“ სმითების ოჯახის მკვლელობის შესახებ ახალი დეტალები გახდა ცნობილი.  სამხარაულის ექსპერტიზის ბიუროს დასკვნის თანახმად, რომელიც ბრალდებულის ადვოკატებსაც გადაეცათ, მწყემსმა მალხაზ კობაურმა ლორა სმითი გააუპატიურა, მისი 4 წლის შვილი ქელებ სმითი კი თოფის მიბჯენით მოკლა.

ხადის ხეობაში ამერიკელი ოჯახის მკვლელობაში ბრალდებული 19 წლის მწყემსი სასამართლოზე გამოძიებისთვის თავდაპირველად მიცემული ჩვენების ნამდვილობას უარყოფდა და აცხადებდა, რომ სამი ადამიანი არა მან, არამედ ორმა უცხო პირმა მოკლა. განსხვავებულია ხადის ხეობის მკვიდრთა ნაწილის და სამართალდამცველების ვერსია. 

7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმითი და მისი მეუღლე ლორა - დაღუპულები იპოვეს. მოგვიანებით იპოვეს მათი 4 წლის ბავშვის ცხედარიც. მათი მკვლელობის ბრალდებით 19 წლის მწყემსი მალხაზ კობაური დააკავეს. მას 11 ივლისს წინასაწარი პატიმრობა შეეფარდა.