საქალაქო სასამართლოში ნატო ჩხეიძის გამოკითხვა დასრულდა

საქალაქო სასამართლოში „ომეგა ჯგუფის“ დამფუძნებლის ნატო ჩხეიძის გამოკითხვა დასრულდა. ის სასამართლოში მეორედ გამოიკითხა. საქმე ეხება „ომეგა ჯგუფის“ გარშემო ბოლო დროს განვითარებულ პროცესებს.

როგორც გამოკითხვის შემდეგ ჩხეიძემ ჟურნალისტებს განუცხადა, რესტრუქტურიზაციის შემთხვევაში, კანონის დაცვით, „ომეგა ჯგუფი“ დავალიანებას „კაპიკ-კაპიკ“ გადაიხდის როგორც ეს პარლამენტის თავმჯდომარემ განაცხადა, რომელმაც მისივე თქმით, ახლა უკვე შემოსავლების დეპარტამენტის უფროსის მოვალეობა შეითავსა.

ჩხეიძემ ზაზა ოქუაშვილის პროკურატურაში არმისვლის მიზეზიც განმარტა. მისი თქმით, ოქუაშვილი აპირებს საგამოძიებო უწყებასთან ითანამშრომლოს და მისცეს ჩვენება.

„გამოძიებისთვის, ვფიქრობ მნიშვნელოვანია ზაზა ოქუაშვილის პასუხები და არა მისი ფიგურა. მან გააკეთა განცხადება და მეც ვეთანხმები, რომ დაცული არ არის მისი უსაფრთხოება, მით უმეტეს იმ ფონზე, როდესაც საქართველოს პარლამენტის თავმჯდომარემ, რომელსაც წესით, სრულიად არ ეხება ეს საკითხი, პროკურატურას ტელეეკრანიდან პირდაპირი მესიჯი მისცა, თუ როგორ უნდა მოქცეულიყო“, - განაცხადა ჩხეიძემ.

ექსპერტიზის დასკვნის შესახებ, რომლის თანახმადაც ზაზა ოქუაშვილისა და ლევან ყიფიანის საუბრის ჩანაწერი ავთენტიკური არ არის, ჩხეიძე აცხადებს, რომ მას არ ენდობა.

„ვერანაირ ვარაუდს ვერ გამოვთქვამ ვის უნდა გაევრცელებინა ან ჩაეწერა ეს ჩანაწერები, თუმცა უტყუარად ვამბობ, რომ ზაზა ოქუაშვილს ამასთან კავშირი არ აქვს. ოქუაშვილის ინტერესებში შედის, რომ ამხილოს დღევანდელი ჩრდილოვანი მმართველობა და ეს ინტერესები, ალბათ საქართველოში ნაკლებად, მაგრამ ლონდონში ბოლომდე იქნება დაცული“, - განაცხადა ნატო ჩხეიძემ.

პროკურატურამ მედიაში გასულ აუდიოჩანაწერებზე ჩატარებულ ექსპერტიზასთან დაკავშირებით განცხადება დღეს გაავრცელა.

3 ოქტომბერს, „ომეგა ჯგუფის“ საქმესთან დაკავშირებით გავრცელებული აუდიოჩანაწერების ერთ-ერთი მონაწილე, სპორტის ყოფილი მინისტრი ლევან ყიფიანი სასამართლო წესით დაკითხეს. ყიფიანმა დაკითხვის შემდეგ მედიას განუცხადა, რომ ფარულ ჩანაწერებს ის და ზაზა ოქუაშვილი ერთად აკეთებდნენ.

პირველი ჩანაწერი რამდენიმე კვირის წინ "იბერიას" ეთერში გავრცელდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“.

ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს. 

27 სექტემბერს საგამოძიებო უწყებაში "ომეგა ჯგუფის" სამი დირექტორი დაიბარეს, - მათ შორის: ზაზა ოქუაშვილი, ირაკლი ჩუბინიშვილი და გიორგი ქურდაძე. ზაზა ოქუაშვილი პროკურატურაში დღეს უნდა მისულიყო, მაგრამ განცხადება გაავრცელა, რომელშიც წერს, რომ ის ლონდონში რჩება და საქართველოში დაბრუნებას არ აპირებს.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.