ადვოკატი: პატარკაციშვილის საქმეზე მერებაშვილს ბრალი წარუდგინეს, ორგანიზატორ სააკაშვილს კი არა

ბადრი პატარკაციშვილის მკვლელობის მომზადების საქმეზე ერთ-ერთი ბრალდებულის გიორგი მერებაშვილის ადვოკატი კახა ხვისტანი აცხადებს, რომ მერაბაშვილის ქმედებაში დანაშაულის ნიშნები არ იკვეთება და ვერც აღკვეთის ღონისძიების სახედ პატიმრობის გამოყენების აუცილებლობას ვერ ხედავს. ინფორმაციას სააგენტო "ინტერპრესნიუსი" ავრცელებს.

ადვოკატი ასევე ამბობს, რომ პროკურატურამ ბრალი წაუყენა მერებაშვილს, მაშინ როდესაც ბრალი წარდგენილი არ აქვს მიხეილ სააკაშვილს, ვინც აუდიოჩანაწერების თანახმად, ბადრი პატარკაციშვილის მკვლელობას უკვეთავდა.

"მერაბაშვილს იჭერენ და მიშა სააკაშვილს, ვისი ორგანიზებითაც ჩაიდინა ეს დანაშაული, არ აქვს ბრალი წარდგენილი. მე კი არ ვიძახი, რომ მასაც წარუდგინონ ბრალი, თუმცა სადაა ლოგიკა, ორგანიზატორს არ აძლევენ პასუხისგებაში და შემსრულებელს აძლევენ", - ამბობს ადვოკატი. 

მთავარი პროკურატურის ცნობით, „ფარული კადრების ჩამწერი პირების საქმეზე“,  ერთ-ერთი ბრალდებულის საცხოვრებელ სახლში ჩატარებული ჩხრეკის დროს, იპოვეს შსს-ს აუდიოჩანაწერები, რომლებიც 2007 წლის 4 და 5 თებერვლით თარიღდება. ჩანაწერებში კუდის ყოფილი მაღალჩინოსნები ბადრი პატარკაციშვილის მკვლელობას გეგმავენ, მათ შორის ცდილობენ გადმოიბირონ ბიზნესმენის დაცვის წევრი. ამასთან ჩანაწერებით ირკვევა, რომ პატარკაციშვილის ლიკვიდაცია მიხეილ სააკაშვილის მიერ იყო სანქცირებული. საქმეზე ბრალდებულები არიან: გიორგი დგებუაძე, რევაზ შიუკაშვილი, ლევან ქარდავა და გიორგი მერებაშვილი.

ერთი ჩანაწერის მიხედვით, გიორგი დგებუაძე პატარკაციშვილის დაცვის წევრთან ლაპარაკისას ზურაბ ჟვანიასაც ახსენებს. 

ქარდავა და შიუკაშვილი პატარკაციშვილის მკვლელობის მომზადების ბრალს არ აღიარებენ. ორივე ბრალდებული პირადი ცხოვრების ამსახველი ჩანაწერების საქმეზე სასჯელს უკვე იხდიან.

რაც შეეხება გიორგი დგებუაძეს, ის ინ­ტერ­პო­ლის წი­თე­ლი ცირ­კუ­ლა­რით იძებ­ნე­ბო­და და მისი ექ­სტრა­დი­რე­ბა ნი­დერ­ლან­დე­ბის სა­მე­ფო­დან სა­ქარ­თვე­ლო­ში 2016 წლის მარ­ტში გან­ხორ­ცი­ელ­და. კუდ-ის ყო­ფი­ლი მა­ღალ­ჩი­ნო­სა­ნი გი­ორ­გი დგე­ბუ­ა­ძე სა­ქარ­თვე­ლოს პრო­კუ­რა­ტუ­რის მო­თხოვ­ნით ჩა­მო­იყ­ვა­ნეს.

გი­ორ­გი დგე­ბუ­ა­ძე მსჯავრდებულია ასევე, 2006 წლის 12 იან­ვარს, კუდ-ის უფ­როს­თან და­ვით ახა­ლა­ი­ას­თან და ამა­ვე დე­პარ­ტა­მენ­ტის სხვა მა­ღალ­ჩი­ნოს­ნებ­თან ერ­თად, "ნავ­თლუ­ღის" ავ­ტო­სად­გურ­ში სამი ახალ­გაზ­რდის წი­ნას­წარ და­გეგ­მილი მკვლე­ლო­ბის მო­ნა­წი­ლე­ო­ბისთვის და სამ­სა­ხუ­რებ­რი­ვი უფ­ლე­ბა­მო­სი­ლე­ბის გა­და­მე­ტე­ბისთვის. 

2016 წელს, გია დგებუაძეს სასჯელის სახით 9 წლით თავისუფლების აღკვეთა მიესაჯა.