გახარია: პოლიციის მიზანი არა კარავი, არამედ მოქალაქეების უსაფრთხოებაზე ზრუნვაა

შინაგან საქმეთა მინისტრი გიორგი გახარია აცხადებს, რომ რუსთაველზე კარვების აკრძალვა პოლიციისთვის თვითმიზანი არასდროს ყოფილა და შინაგან საქმეთა სამინისტროს მთავარი ამოცანა საკუთარი მოქალაქეების დაცვაა. ამის შესახებ მან ჟურნალისტებთან განაცხადა.

,,ჩვენ ვდგავართ ყოველთვის ჩვენი მოქალაქეების გვერდით, ჩვენ ერთად ვსწავლობთ ქვეყნის მომავალს, ჩვენი მიზანია განვითარება და უსაფრთხოება. კარავი არასდროს ყოფილა ჩვენი თვითმიზანი. პოლიცია ყოველთვის მოქმედებდა ჩვენი მოქალაქეების და პირველ რიგში, აქციის მონაწილეების უსაფრთხოების მიზნით. თუმცა, დავინახეთ ესკალაციის მზარდი საფრთხე, დესტაბილიზაციის რისკი და ჩვენ ვიმოქმედეთ ისე, როგორც ვიმოქმედეთ. დღეს პარლამენტის წინ ჩვენ ვხედავთ საჭიროზე უფრო მეტ კარავს. პოლიცია გააგრძელებს თავის მოქალაქეებზე ზრუნვას .ამისთვის ჩვენ გამოვიყენებთ ყველა ინსტრუმენტს, გავაძლიერებთ შესაბამის დანაყოფებს.

მოგეხსენებათ ჩვენ გვქონდა კონკრეტული ინფორმაცია დესტაბილიზაციის შესახებ, აქედან გამომდინარე ხაზგასმით მინდა აღვნიშნო, რომ პოლიცია სრულად შეასრულებს თავის ფუნქციას - უზრუნველყოს მოქალაქეების და პირველ რიგში აქციის მონაწილეების უსაფრთხოება", - განაცხადა გახარიამ.

აქცია სახელწოდებით „კარვებით ვიცავ თავისუფლებას“ რუსთაველის გამზირზე თბილისის მერის კახა კალაძის განცხადებას მოჰყვა. ზაზა სარალიძემ მერიას თხოვნით მიმართა, რომ აქციის ჩატარების უფლება დეკემბრის ბოლომდე მიეცათ, თუმცა მერიაში განუცხადეს, რომ 7 დეკემბრიდან დაგეგმილი აქციის ჩატარების დრო და ადგილი შეეცვალა.

სარალიძის შვილი, დავით სარალიძე ერთ-ერთი იყო 2017 წლის პირველ დეკემბერს ხორავას ქუჩაზე მოკლული ორი არასრულწლოვნიდან. ამ საქმეზე პარლამენტში დროებითი საგამოძიებო კომისია შეიქმნა. საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.