პროკურატურა: სარალიძეს ნებისმიერ დროს შეუძლია პროკურორს შეხვდეს, თუ შეხვედრა საქმიანი იქნება

თბილისში, ხორავას ქუჩაზე მოკული ერთ-ერთი მოზარდის მამა ზაზა სარალიძე გენერალურ პროკურატურასთან საგამოძიებო უწყების წარმომადგენლებთან შეხვედრის მოთხოვნით მივიდა.

სარალიძეს ძირითადი კითხვები პროკურატურასთან ხორავას ქუჩის საქმეზე აქვს. იმ შემთხვევაში თუკი სარალიძე საგამოძიებო უწყებაში შევა ის თემრილან მაჩალიკაშვილის საქმით და რუსთაველის გამზირზე მომხდარ ინციდენტებზე გამოძიების მიმდინარეობითაც დაინტერესდება.

პროკურატურასთან სარალიძის მხარდასაჭერად მალხაზ მაჩალიკაშვილიც არის მისული. 

ზაზა სარალიძის მოთხოვნებთან დაკავშირებით განცხადება გენერალურმა პროკურატურამ გაავრცელა. უწყების ცნობით, ზაზა სარალიძეს შეუძლია, ნებისმიერ დროს შეხვდეს საქმის პროკურორს, თუ ეს შეხვედრა საქმიანი იქნება და მისი მხრიდან მორიგ აგრესიულ ქმედებას არ ექნება ადგილი.

"როგორც თავად აღნიშნავს, ზაზა სარალიძეს გენერალურ პროკურორთან შეხვედრა სურს სამ სხვადასხვა საქმესთან დაკავშირებით, აქედან ერთ-ერთში დაზარალებულია, მეორეში დაინტერესებული მხარე, მესამე საქმეზე კი ბრალდებული. სამივე საქმის პროკურორი მზად არის მასთან შესახვედრად, თუმცა როგორც წესი, ამ სახის შეხვედრები ზაზა სარალიძის მხრიდან აგრესიული ქმედებით სრულდება.

რაც შეეხება ზაზა სარალიძის შეხვედრას გენერალურ პროკურორთან, ეს შეხვედრა შედგა და მას გენერალური პროკურორის შალვა თადუმაძის მიერ განემარტა, რომ საქმეზე, გამონაკლისის გარეშე, პასუხისგებაში იქნება მიცემული ყველა პირი, ვის მიმართაც შეგროვდება ურთიერთშეჯერებული მტკიცებულებების ერთობლიობა.

აქვე შეგახსენებთ, რომ ქ. თბილისში, ხორავას ქუჩაზე მომხდარი მკვლელობის სისხლის სამართლის საქმეზე გამოძიება მიმდინარეობს შსს-ში, საქართველოს გენერალური პროკურატურა კი მასზე საპროცესო მხარდაჭერას ახორციელებს.

მეორე საქმე, რომელზეც ზაზა სარალიძეს სურს გენერალური პროკურორთან საუბარი, როგორც თავად აღნიშნავს, არის „კარვების საქმე“. ამ საქმეს იძიებს შსს-ს გენერალური ინსპექცია.

მესამე საქმეზე კი, სადაც ზაზა სარალიძე ბრალდებულია პოლიციელზე თავდასხმაში, სასამართლოში მიმდინარეობს განხილვა და მორიგი პროცესი ჩანიშნულია 8 თებერვალს. ზაზა სარალიძეს შეუძლია, ნებისმიერ დროს შეხვდეს საქმის პროკურორს, თუ ეს შეხვედრა იქნება ნაყოფიერი, საქმიანი და ზაზა სარალიძის მხრიდან მორიგ აგრესიულ ქმედებას არ ექნება ადგილი", - აცხადებენ გენერალურ პროკურატურაში.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.