გორის რაიონულ სასამართლოში სმითების მკვლელობის საქმის განხილვა იწყება

გორის რაიონულ სასამართლოში ხადის ხეობაში სმითების ოჯახის სამი წევრის მკვლელობაში ბრალდებული მალხაზ კობაურის საქმის განხილვა დღეიდან იწყება.

მცხეთის რაიონულმა სასამართლომ ეს საქმე განსახილველად ნაფიც მსაჯულებს გადასცა. განხილვის ადგილად კი გორის რაიონული სასამართლო შეირჩა.

როგორც ცნობილია, სასამართლო სხდომები ყოველდღიურად გაიმართება. გორის რაიონულ სასამართლოსთან იმყოფებიან ამერიკის შეერთებული შტატების საელჩოს წარმომადგენლებიც. სასამართლო პროცესი დახურულ რეჟიმში ჩატარდება. 

დახურულ რეჟიმში დღეს სასამართლო ორივე მხარის შესავალ სიტყვებს მოისმენს. ასევე დაიკითხება რამდენიმე მოწმეც. ბრალის დასამტკიცებლად ბრალდების მხარეს ვადა 9აპრილს ეწურება. პროკურორ ზაზა დათულიშვილის განმარტებით, მათ მიერ წარდგენილი მტკიცებულებები საკმარისი იქნება კობაურის დანაშაულის დასამტკიცებლად და ეს 1-თვიანი ვადაც ამისათვის სავსებით საკმარისია, ვინაიდან საქმე ყოველდღიურად განიხილება.

მალხაზ კობაურის ადვოკატის, ალექსანდრე კობაიძის განცხადებით, ბრალდების მხარეს ზუსტად ერთი თვე რჩება იმისთვის, რომ დაკავებულს ბრალი დაუმტკიცოს.

„იქიდან გამომდინარე, რომ პროკურატურას ერთი თვე რჩება ჩემი დაცვის ქვეშ მყოფისთვის ბრალის დასამტკიცებლად, სასამართლო პროცესები ინტენსიურ რეჟიმში ყოველდღიურად დაინიშნა. ფაქტია, რომ მტკიცებულებები არასაკმარისია“, - განაცხადა ადვოკატმა ალექსანდრე კობაიძემ.

გორის რაიონულ სასამართლოსთან იმყოფებიან ამერიკის შეერთებული შტატების საელჩოს წარმომადგენლებიც. სასამართლო პროცესი დახურულ რეჟიმში წარიმართება.

სმითების მკვლელობაში ბრალდებულს ვერდიქტი მოსამართლე გოგა კუპრეიშვილმა და 12-მა მსაჯულმა უნდა გამოუტანონ. ამ საქმეზე განაჩენი მარტის ბოლომდე გამოცხადდება, რადგან 9-თვიანი ვადა სწორედ 9 აპრილს იწურება.

7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმითი და მისი მეუღლე ლორა - დაღუპული იპოვეს. მოგვიანებით იპოვეს მათი 4 წლის ბავშვის ცხედარიც. მათი მკვლელობის ბრალდებით 19 წლის მწყემსი მალხაზ კობაური დააკავეს. მას 11 ივლისს წინასაწარი პატიმრობა შეეფარდა.

სმითების ოჯახის მკვლელობაში ბრალდებული მალხაზ კობაური გამოძიების პროცესში რამდენჯერმე გამოიკითხა. "იმედის კვირამ" კადრები მოიპოვა, რომელიც 2018 წლის 8 ივლისს, პოლიციის განყოფილებაში ზუსტად იმ დროს არის გადაღებული, როცა მალხაზ კობაურმა სამართალდამცველებს აღიარებითი ჩვენება მისცა.