პრემიერი: ნებისმიერი მთავრობა კანონით იქნება ვალდებული ბიუჯეტის მეოთხედი განათლებაზე დახარჯოს

საქართველოს პრემიერმინისტრმა მამუკა ბახტაძემ მთავრობის სხდომის დაწყებამდე განათლების რეფორმასთან დაკავშირებით ახალი კანონპროექტის ინიცირების შესახებ განაცხადა.

ბახტაძის თქმით, დღეს მოხდება კანონპროექტის ინიცირება, რომლის მიხედვითაც ნებისმიერი მთავრობა ვალდებული იქნება მთლიანი შიდა პროდუქტის 6%, ანუ ბიუჯეტის მეოთხედი განათლებასა და ადამიანურ კაპიტალზე მიმართოს.

"მინდა საზოგადოებას შევახსენო, რომ 2012 წელთან შედარებით ჩვენ მილიარდით გავზარდეთ განათლების ბიუჯეტი და წელს არის მილიარდ ექვსასი მილიონი. ამავე დროს ვიღებთ ვალდებულებას, რომ 2020 წელს ის იქნება 2 მილიარდი, 2021 წელს 2.5 მილიარდი, ხოლო 2022 წელს ის გაუტოლდება ჩვენი მთლიანი შიდა პროდუქტის 6%-ს ანუ ის იქნება სამი მილიარდ 400 მილიონი ლარი. ეს იქნება ის მინიმუმი, რომელიც ექნება ვალდებულებად ნებისმიერ ხელისუფლებას, რომ განათლებაზე მიმართოს", - განაცხადა საქართველოს პრემიერმინისტრმა. 

ბახტაძის განმარტებით, ეს თანხა და ინვესტიციები მოხმარდება საქართველოში განათლების ხუთივე დონეს: სკოლამდელი განათლება, საშუალო განათლება, პროფესიული განათლება, უმაღლესი განათლება და მეცნიერება.

"პირადად მე ჩავალ საქართველოს ყველა რეგიონში, ყველა დასახლებასა და პუნქტში, შევალთ ყველა ქართულ ოჯახში, რომ ჩვენს მოქალაქეებთან ვისაუბროთ ამ ეროვნულ იდეაზე, მივიღოთ მათი რჩევები და რეკომენდაციები", - განაცხადა პრემიერმინისტრმა და დასძინა, რომ მთავრობას ექნება ღია პლატფორმა ონლაინრეჟიმში, სადაც ხელისუფლება მზად იქნება განიხილოს ყველასთან, მათ შორის სამოქალაქო სექტორის ჩართულობით, ამ რეფორმის სამოქმედო გეგმა.