გიორგი ქობულია: ზედმეტად პრინციპული აღმოვჩნდი

ეკონომიკის ყოფილი მინისტრის, გიორგი ქობულიას განცხადებით, ის ზედმეტად პრინციპული აღმოჩნდა და ყველას უნდა სცოდნოდა, რომ არ დაუჭერდა მხარს ისეთ გადაწყვეტილებებს, რომლებიც არ ესმის. ამის შესახებ გიორგი ქობულიამ პარლამენტში დეპუტატებთან შეხვედრისას განაცხადა.

"აღმოვჩნდი ზედმეტად პრინციპული. ყველას უნდა სცოდნოდა, რომ არ ვუჭერ მხარს ისეთ გადაწყვეტილებებს, რომელიც არ მესმის. ეს არ იყო ერთი-ორი გადაწყვეტილება, ეს იყო თვეების განმავლობაში მიმდინარე პროცესები. ამაზე მეტის თქმა მიჭირს.

ბევრზე უკეთ მესმის აღქმა საქართველოს მმართველობითი წესების. არაფორმალური თამაშის წესებზე მქონდა ღია მოლაპარაკება თანამდებობაზე დანიშვნამდე, მქონდა შეთანხმება, რომ არ ვიმუშავებდი სხვადასხვა წესებით, მაგრამ ეს ასე არ მოხდა", - განაცხადა გიორგი ქობულიამ. ყოფილმა მინისტრმა ასევე თქვა, რომ მისთვის მთავრობაში არაერთხელ უწოდებიათ "უცხო სხეული". კითხვაზე ვინ უწოდა მას "უცხო სხეული", გიორგი ქობულიამ უპასუხა რომ არა ერთმა.

ახლა ეკონომიკის ყოფილი მინისტრი დეპუტატების შეკითხვებს ისმენს, მანამდე კი გიორგი ქობულიამ მისი ხედვები გააცნო კანონმდებლებს, შემდეგ კი იმ მიმართულებებზე ილაპარაკა, რაშიც მთავრობას არ ეთანხმება და პრობლემებს ხედავს. 

ყოფილი თანაგუნდელის დღევანდელ განცხადებებს პრემიერმინისტრი მამუკა ბახტაძე ყაზახეთიდან გამოეხმაურა. “რაც შეეხება სწრაფ გადაწყვეტილებებს, არ ვიცი რა კონტექსტში თქვა მან ეს, მაგრამ ერთ-ერთი ყველაზე მნიშვნელოვანი, რაც გვჭირდება, ეს არის ეფექტური და ამავე დროს, სწრაფი გადაწყვეტილებები. ჩვენ გვჭირდება მეტი ეკონომიკური ზრდა, ინკლუზიური ზრდა, ისეთი ზრდა, რომელიც საქართველოს თითოეულ მოქალაქეს შეეხება და ბუნებრივია, ასეთ დროს აქცენტი სწორეს ეფექტურ და სწრაფ გადაწყვეტილებებზე უნდა კეთდებოდეს. ეს არის ჩემი, როგორც მთავრობის მეთაურის ერთ-ერთი მთავარი ამოცანა და ამას აუცილებლად უზრუნველვყოფ”, - განაცხადა მამუკა ბახტაძემ.

ჟურნალისტის კითხვას, გიორგი ქობულიას კონკრეტულად რომელი ინიციატივები ფერხდებოდა, მამუკა ბახტაძემ უპასუხა, რომ ეს თავად ყოფილმა მინისტრმა უნდა დააკონკრეტოს. “გოგა ქობულია არის ძალიან მაღალი დონის ეკონომისტი, აქვს შესაბამისი გამოცდილება, იგი მუშაობდა დარგების განვითარების ძალიან მნიშვნელოვან სტრატეეგიებზე და ამ ნაწილში რა თქმა უნდა, ძალიან ბევრი და საინტერესო დოკუმენტი შედგა. თუმცა, ამავე დროს, ჩვენ გვჭირდება კონკრეტული შედეგები, ეფექტური და სწრაფი გადაწყვეტილებები. არც ერთი ინიციატივა, რომელმაც შეიძლება დამატებითი დოვლათი და ღირებულება შექმნას ჩვენი ეკონომიკისთვის, არასოდეს გაჩერდება. მეტიც, თითოეული სამინისტროს, მათ შორის, უპირველეს ყოვლისა ეკონომიკის სამინისტროს მთავარი დავალებაა, მეტი ინიციატივა მოდიოდეს უწყებებიდან, რისი გაკეთება შეგვიძლია ახლებურად, რა სიახლე შეგვიძლია შევთავაზოთ ჩვენს საზოგადოებას, ინვესტორებს და კერძო სექტორს. სწორედ ასე უნდა მუშაობდეს ეფექტური მთავრობა, ჩვენ ამას ვაკეთებთ და კიდევ უფრო გავაუმჯობესებთ”, - განაცხადა მამუკა ბახტაძემ. 

ეკონომიკის ყოფილმა მინისტრმა გიორგი ქობულიამ თანამდებობიდან გადადგომის მიზეზებზე გადაცემა „ფორბსის კვირაში“ პირველად ისაუბრა. მისი თქმით, სიმართლეა გავრცელებული ინფორმაცია, რომ გადადგომის  შესახებ განცხადების დაწერა სთხოვეს. 

ეკონომიკის მინისტრმა გიორგი ქობულიამ თანამდებობა პრემიერმინისტრის ბრძანებით დატოვა. ის თანამდებობიდან 2019 წლის 18 აპრილს გადადგა. ეკონომიკის მინისტრად ნათია თურნავა დაინიშნა.  

„თუ რომელიმე მინისტრი იმ ტემპს ჩამორჩება, რაც აუცილებელია იმისთვის, რომ შეპირებული შედეგი ვაჩვენოთ, ბუნებრივია ცვლილება არ დააყოვნებს“, - განაცხადა საქართველოს პრემიერმინისტრმა მამუკა ბახტაძემ. 

გიორგი ქობულია ეკონომიკის მინისტრად 2018 წლის 12 ივლისს დაინიშნა, მანამდე კი ბიზნესის სფეროში საქმიანობდა. გიორგი ქობულია ეკონომიკის მინისტრის თანამდებობას ათი თვის განმავლობაში იკავებდა.