ოპოზიცია მზადაა პროპორციულ არჩევნებზე საკონსტიტუციო ინიციატივის წარდგენას დაესწროს

როგორც საპარლამენტო, ისე არასაპარლამენტო ოპოზიციის წევრები აცხადებენ, რომ მზად არიან პროპორციული არჩევნების შესახებ საკონსტიტუციო ინიციატივის წარდგენას დაესწრონ.

მათივე თქმით, მათთვის პროპორციულ სისტემაზე გადასვლა მისაღებია.

"რა თქმა უნდა, ნულოვანი თუ ბუნებრივი ბარიერით პროპორციულ სისტემას თავისი ნაკლოვანებები აქვს და ამაზე აუცილებლად მსჯელობა უნდა გაგრძელდეს, მაგრამ უნდა ითქვას, რომ ეს ნამდვილად გაცილებით ჯობს და შეუდარებლად უკეთესია ვიდრე არსებული მაჟორიტარული სისტემა, რომლის პირობებშიც, როგორც ჩვენ ვნახეთ ამ წლების განმავლობაში, ხელისუფლებამ მოიგო ყველა არჩევნები, ყველა ოლქი. პრაქტიკულად, გამოიყენა ყველა საშუალება რაც მის ხელში იყო, შესაბამისად მოახდინა მაჟორიტარული სისტემის დისკრედიტაცია, რაც შესაძლებელია სამართლიან გარემოში სრულიადაც არ იყოს ასეთი კრიტიკის საგანი“,-აცხადებს გიგი წერეთელი.

პარლამენტის ვიცესპიკერი თამარ ჩუგოშვილი პოლიტიკური პარტიების ნაწილის პოზიციას გამოეხმაურა 2020 წლის არჩევნებზე საარჩევნო ბლოკების დაშვებასთან დაკავშირებით. მისი თქმით, ნულოვანი ბაირიერის პირობებში საარჩევნო ბლოკებზე საუბარი გამორიცხულია.

"„როდესაც პოლიტიკურ ძალას, რომელსაც ამბიცია აქვს, რომ პოლიტიკური პარტიაა და უნდა წარმოადგენდეს ქართველ ხალხს პარლამენტში და თან ამ დროს ამბობს, რომ მე მარტო ვერ მოვაგროვებ 0,7 %-ზე მეტს, ამიტომ კიდევ რაღაც ჩამიწერეთ კონსტიტუციაში, რომ 0,7-ს თუ ვერ მოვაგროვებ, ვიღაცა მივიმაგრო და იმის მეშვეობით მოვხვდე პარლამენტში - თვითონ განსაჯეთ, ეს რას ნიშნავს. არ მინდა გამოვიყენო ის სიტყვა, რაც თავში მომდის. უბრალოდ უხერხულია, მეტი თუ არაფერი პოლიტიკურ ძალას გინდოდეს, რომ ქვეყანაში პარტიად მიიჩნეოდე, საქართველოს პარლამენტში ადგილი გინდოდეს და ამბობდე, რომ 0,7 პროცენტიც კი არ დამიჭერს მხარს ქვეყანაში და მაინც უნდა აღმოვჩნდე პარლამენტში.ეს არ არის ჯანსაღი და სწორი მიდგომ. ამიტომ 0%-იანი ბარიერი და ბლოკები ფაქტობრივად გამორიცხავს ერთმანეთს. ანუ, ან დაბალი ბარიერია და არ არსებობს ბლოკების საჭიროება, ან მაღალი ბარიერია და ლოგიკური იქნებოდა ბლოკებზე საუბარი“,-აცხადებს ჩუგოშვილი.

მმართველი გუნდი 1 ივლისს ,,პროპოციული არჩევნები 2020“-ის პრეზენტაციას გამართავს, რომელიც საკონსტიტუციო ინიციატივას წარმოადგენს. პრეზენტაციაზე მმართველი გუნდი იწვევს როგორც პოლიტიკური პარტიების წარმომადგენლებს, ასევე ცესკოს წარმომადგენლებს, საქართველოში აკრედიტებულ დიპლომატიურ კორპუსს, საერთაშორისო და არასამათავრობო ორგანიზაციებს.

ნულოვანი ბარიერით პროპორციულ საარჩევნო სისტემაზე გადასვლის შესახებ საკონსტიტუციო ცვლილებები უკვე ინიცირებულია. დოკუმენტს უმრავლესობის 80 დეპუტატი აწერს ხელს.

პარტია „ქართული ოცნების“ თავმჯდომარე ბიძინა ივანიშვილი გამოდის ინიციატივით, რომ 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდეს. აღნიშნული განცხადება ივანიშვილმა 24 ივნისს გამართულ საგანგებო ბრიფინგზე გააკეთა.